ԵՐԵՎԱՆ, 27 դեկտեմբերի — Sputnik. Հայաստանի Ազգային Օլիմպիական կոմիտեի նախագահ ու մեծահարուստ գործարար Գագիկ Ծառուկյանը Հայաստանի մարզիկների լավագույն տասնյակին Hyundai ավտոմեքենաներ է նվիրել։
Մարզիկների մեծարման երեկոն կայացել է դեկտեմբերի 27-ին, Մարզահամերգային համալիրում:
«Մենք մեզ լավ ենք զգում, երբ մարզիկների պարգևատրման ժամանակ հայկական դրոշն ենք տեսնում ու հայկական օրհներգն ենք լսում` տեսնելով մեր մարզիկների ձեռքբերումները», – ասաց Ծառուկյանը։
Բացի լավագույն տասնյակից, ՀՀ նախագահից առանձին մրցանակներ ստացան մի քանի այլ մարզիկներ ու սպորտի գործիչներ։ Նրանց շարքում են Լևոն Ջուլֆալակյանը, Փաշիկ Ալավերդյանը, Տիգրան Կիրակոսյանը, Հովհաննես Բաչկովը, Սիմոն Մարտիրոսյանը, Լևոն Հայրապետյանը, Դավիթ Թորոսյանը։
Դեկտեմբերի 25–ին հայտարարվել են Հայաստանի լավագույն տասը մարզիկները։ Նրանց ընտրել են ՀՀ քաղաքացիները` սմս–քվեարկության միջոցով (դեկտեմբերի 11–ից) ու մարզական լրագրողները։
