ԵՐԵՎԱՆ, 27 դեկտեմբերի — Sputnik. Ժողովրդական արտիստ Արմեն Ջիգարխանյանը ԱՄՆ-ում տան վաճառքից ստացված բոլոր փողերը տվել է նախկին կնոջը` Տատյանա Վլասովային։ Այդ մասին դերասանի խորթ որդին պատմել է ռուսական Առաջին ալիքի «Թող խոսեն» ("Пусть говорят") հաղորդման ժամանակ։
Ստեփան Ջիգարխանյանը` Արմեն Ջիգարխանյանի նախկին կնոջ (Տատյանա Վլասովայի) որդին, պատմել է, որ հայրն ի սկզբանե պատրաստվել է թատրոնը հանձնել ժառանգորդին և տեղափոխվել ԱՄՆ Տատյանա Վլասովայի մոտ, բայց Վիտալինայի հայտնվելը փոխել է բոլոր ծրագրերը։
Հայտնի դերասանը, ավելի քան 40 ապրելով Վլասովայի հետ, որոշել է ամուսնալուծվել հանուն երիտասարդ Վիտալինա Ցիմբալյուկ-Ռոմանովսկայայի։ Այդ ժամանակ, երբ Վիտալինան նվաճել է Ջիգարխանյանի սիրտը, Վլասովան արդեն երկար տարիներ ապրելիս է եղել ԱՄՆ-ում, որտեղ նախկին ամուսինը մեծ տուն է գնել Դալասում։
Այնուամենայնիվ, երբ հարցը հասել է ամուսնալուծությանը, ապա ամուսինների ունեցվածքը հավասար կիսվել է, այդ թվում` ԱՄՆ-ի տունը, որի արժեքը կազմել է շուրջ 135 հազար դոլար։ Վլասովան համոզված է եղել, որ Արմեն Բորիսովիչը բոլոր փողերը կթողնի կնոջը, որպեսզի նա ոչ մի բանի կարիք չունենա դերասանի հետ ամուսնալուծությունից հետո։ Սակայն Ջիգարխանյանի սկզբնական որոշման վրա ազդել է նորաթուխ սիրուհին։
«Երբ դրվեց ունեցվածքը կիսելու հարցը, երկու-երեք տարի առաջ էր, նրան հարցրին. «Իսկ Դալասի տու՞նը»։ Նա պատասխանեց. «Թող նա այդ տան հետ անի այն, ինչ ուզում է։ Ապրի, վաճառի, ուրիշ բնակարան գնի, ծախսի այդ փողերը։ Ես թողնում եմ»։ Հետո հավանաբար միջամտել է Վիտալինան և ասել, որ չի կարելի բաժանել ունեցվածքը, պետք է առավելագույն օգուտ քաղել», — հաղորդման ժամանակ պատմել է Ստեփանը։
Նրա խոսքով` երբ Վիտալինան անհետացել է հոր կյանքից, ամեն ինչ տեղն է ընկել։ Ուստի Ջիգարխանյանը կատարողական թերթ է ստորագրել, որի համաձայն` Դալասում տան վաճառքից ստացված գումարը մնում է Տատյանա Վլասովային։
Ծրագրի բոլոր հյուրերը նշել են, որ Ջիգարխանյանը վեհանձն արարք է գործել։ Ստեփան Ջիգարխանյանն էլ իր հերթին ասել է, որ այսուհետև կանոնավոր շփվելու է հոր հետ։
