ԵՐԵՎԱՆ, 26 դեկտեմբերի — Sputnik. Վրաստանի պաշտպանության նախարար Լևան Իզորիան հույս է հայտնել, որ 2018թ-ին հայ և վրացի զինվորականները կմասնակցեն «Արժանի գործընկեր» (Noble Partner) և «Ճարպիկ ոգի» (Agile Spirit) բազմազգ զորավարժություններին: Այս մասին հայտնում է Նովոստի-Գրուզիան` ներկայացնելով ՀՀ ՊՆ ղեկավար Վիգեն Սարգսյանի և նրա վրացի գործընկեր Իզորիայի հետ հանդիպման արդյունքները։
Հայաստանի պաշտպանության նախարարը Թբիլիսիում է գտնվում ՀՀ նախագահ Սերժ Սարգսյանի երկօրյա պաշտոնական այցի շրջանակում` կառավարական պատվիրակության կազմում։
«Կողմերը քննարկել են միջազգային խաղաղապահ առաքելություններում վրացական և հայկական զինվորականների մասնակցությունը, որոնք կողք կողքի պայքարում են աշխարհում խաղաղության և կայունության համար։ Լևան Իզորիան հույս է հայտնել, որ 2018թ-ին «Արժանի գործընկեր» (Noble Partner) և «Ճարպիկ ոգի» (Agile Spirit) բազմազգ զորավարժությունների կմասնակցեն հայ և վրացի զինվորականները», — ասվում է հաղորդագրությունում։
Noble Partner և Agile Spirit զորավարժությունները վերջին մի քանի տարում անցկացվում են Վրաստանում։ Այս տարի Agile Spirit զորավարժությունները Վրաստանում անցկացվել են սեպտեմբերի 3-11-ը։ Մեկնարկից առաջ հայտարարվել էր, որ զորավարժություններին կմասնակցեն նաև հայ զինվորականները։ Սակայն վերջին պահին Երևանը հրաժարվել էր մասնակցությունից։
ՀՀ ՊՆ-ն հայտարարեց, որ Երևանի որոշման մեջ «ոչ մի տարօրինակ» բան չկա, և Հայաստանն ինքնուրույն որոշում է կայացրել։
Իզորիան նաև առաջարկել է հայ զինվորականներին մասնակցել Սաչխերում գնդապետ Բեսիկ Կուտատելաձեի լեռնային նախապատրաստության դպրոցի զորավարժություններին։
Ավելի վաղ Իզորիան և Սարգսյանը հանդիպել են Թբիլիսիում 2016թ-ին։ Այդ ժամանակ նրանք երկկողմ համագործակցության մասին համաձայնագիր են ստորագրել։
Վրաստանի պաշտպանության նախարարությունում համոզված են, որ հայ-վրացական հարաբերությունները ռազմական ոլորտում ավելի արդյունավետ և ինտենսիվ կլինեն 2018թ-ին։
