ԵՐԵՎԱՆ, 26 դեկտեմբերի — Sputnik. «Գազպրոմ Արմենիայի» «Հրազդան-5» ՋԷԿ-ն աշխատանքը կընդլայնի իրանական գազով։ Այդ մասին Sputnik Արմենիային հայտնեց ՀՀ հանրային ծառայությունները կարգավորող հանձնաժողովի սակագնային քաղաքականության վարչության պետ Գարեգին Բաղրամյանը։
Իրան-Հայաստան գազատարի շինարարության ավարտին` 2009 թվականին, այնտեղից սկսեց գազ ստանալ Երևանի ՋԷԿ-ը։ Իրանական գազի յուրաքանչյուր խմ-ից կայանը մոտ 4,5 կՎտ/ժ էլեկտրաէներգիա է արտադրում։ Դրանից Իրանին տալիս են 3-ը, իսկ տարբերությունը թողնում են Հայաստանին։
Վերջերս այդ սխեմային են միացրել նաև «Գազպրոմ Արմենիայի» «Հրազդան-5» ՋԷԿ-ը։ Աստիճանաբար սկսում են մտածել ընդլայնման մասին Հայաստանի համար ձեռնտու բարտերը առավելագույնս օգտագործելու համար։ Իսկ 2018 թվականին այդ լրացուցիչ էլեկտրաէներգիան կօգնի լրացնել Հայկական ԱԷԿ-ի (որտեղ վերանորոգումը շարունակվում է) թերբեռնվածությունը։
«Հրազդան-5»-ը զուգահեռ կշարունակի աշխատել նաև ռուսական գազով։
Իսկ երբ Իրանը 2019 թվականին կառուցի երրորդ բարձրավոլտ գիծը, երկրների միջև էլեկտրաէներգիայի փոխհոսքերի համար միջանցքը գրեթե եռակի կընդլայնվի։ Այդ պատճառով «գազը հոսանքով» սխեման ձեռնտու է գործարկել առավելագույնս, ավելացրեց Բաղրամյանը։
2017 թվականի I կիսամյակում Իրանին բաժին է ընկել Հայաստան մատակարարվող գազի 15%-ը, Ռուսաստանին` 85%-ը։
