ԵՐԵՎԱՆ, 26 դեկտեմբերի — Sputnik. Հատուկ զեղչերը կգործեն քաղավիացիայի 30 վետերանի և նրանց ընտանիքի անդամների համար։ Նրանք կկարողանան թռչել «Armenia» ավիաընկերության չվերթերով 50 տոկոս զեղչով։
Շնորհակալագրերի և ավիաընկերության չվերթերի զեղչի քարտերի հանձնման արարողությունը կայացավ Sputnik Արմենիայի մամուլի կենտրոնում` Armenia ավիաընկերության գլխավոր տնօրեն Ռոբերտ Օգանեսյանի ասուլիսի շրջանակում։
«Այդ պարգևը նշանակում է, որ մեզ դեռ հիշում են և գնահատում մեր ավանդը քաղաքացիական ավիացիայի զարգացման մեջ, քանի որ 2013թ-ից մեզ կարծես մոռացել են։ Այսօրվա միջոցառումը մեզ ուժ և խթան է տվել։ Ես շատ զգացված եմ», — Sputnik Արմենիայի թղթակցի հետ զրույցում ասաց նախկին օդաչու, քաղաքացիական ավիացիայի վետերան Սամվել Ղազարյանը։
Ղազարյանն իր հաշվին 27 հազար թռիչքային ժամ ունի և ավիացիայի ոլորտում աշխատանքի 44 օրացույցային տարի։
«Armenia» ավիաընկերության գլխավոր տնօրեն Ռոբերտ Օգանեսյանի խոսքով` օդաչուները պետք է ըստ արժանվույն գնահատվեն։
«Օդաչուի աշխատանքը յուրահատուկ է, նրանք իրենց կյանքի 25-30 հազար ժամը նվիրում են ուղևորներին` գտնվելով օդում։ Հետևաբար նրանք լավ կենսաթոշակ պետք է ստանան, որը, ցավոք, չեն ստանում», —ասաց Օգանեսյանը։
Այդ նպատակով ավիաընկերությունը որոշել է պարգևատրել նրանց շնորհակալագրերով, ինչպես նաև թույլ տալ վետերաններին և նրանց ընտանիքի անդամներին ավիաընկերության չվերթերից օգտվել 50 տոկոս զեղչով։
«Armenia»-ն ներկա փուլում չվերթեր է իրականացնում նաև դեպի Մինվոդի, Թել Ավիվ, Բեյրութ: Ավիաընկերությունը մտադիր է կանոնավոր չվերթեր գործարկել նաև նոր ուղղություններով։
«Armenia»-ի ավիապարկում երկու ինքնաթիռ կա` Boeing 737-500, Boeing 737-700։ Ընկերությունն ունի 53 աշխատակից։
Ավիաընկերության հիմնադիրներն են Աշոտ Թորոսյանը (51 տոկոս բաժնետոմս), Թամազ Գաիաշվիլին (24 տոկոս) և Ռոբերտ Օգանեսյանը (25 տոկոս): Հայաստանն ազգային ավիափոխադրողից զրկվել է 2013 թվականին` «Արմավիա» ընկերության սնանկացումից հետո:
Հայրենական ավիաշուկայում այսօր երկու հայկական ընկերություն է գործում` «Armenia»-ն և «Տարոն-Ավիան»։
