ԵՐԵՎԱՆ, 26 դեկտեմբերի — Sputnik. Հայկական օդանավակայաններում ուղևորահոսքը 2017 թվականի դեկտեմբերի 24-ի դրությամբ կազմել է 2,495 մլն մարդ։ Այս մասին լրագրողներին ասաց ՀՀ կառավարությանը կից Քաղավիացիայի գլխավոր վարչության պետ Սերգեյ Ավետիսյանը։
Նրա խոսքով` 2016 թվականի նույն ժամանակահատվածում այդ ցուցանիշը կազմել է 2 մլն 117 հազար մարդ։ Այդպիսով, ուղևորահոսքի աճը կազմել է 21,1%։
«Բացի այդ, ավելացել է «Զվարթնոցից» տեղափոխած բեռների ծավալը։ 2017 թվականի հունվար–նոյեմբերին այդ ցուցանիշը կազմել է 20,6 հազար տոննա, ինչը գրեթե 30% ավել է անցյալ տարվա նույն ժամանակահատվածի ցուցանիշից», – նշեց Ավետիսյանը։
Այս դեկտեմբերի դրությամբ Հայաստանի օդանավակայաններից 28 ավիաընկերություն է կանոնավոր չվերթեր է իրականացնում` օրական 30-35 չվերթ կատարելով։ 2017 թվականի դեկտեմբերի 25-ի դրությամբ Հայաստանի օդային տարածքով 53 270 չվերթ է իրականացվել դեպի այլ երկրներ։ Դա գրեթե 40% շատ է անցյալ տարվա ցուցանիշից։
