ԵՐԵՎԱՆ, 24 դեկտեմբերի- Sputnik. Sputnik Արմենիայի «Համով Հայաստան» խոհարարական նախագիծը շնորհակալագիր է ստացել «Խոհարարական ավանդույթների զարգացման և պահպանման» հասարակական կազմակերպության կողմից՝ ազգային խոհանոցի ավանդույթների պահպանման մեջ կարևոր ներդրում ունենալու համար:
Շնորհակալագրի հանձնումը տեղի է ունեցել կազմակերպության 10-ամյակի միջոցառման շրջանակում:
«Շնորհակալություն եմ հայտնում Sputnik Արմենիա գործակալությանն ու ռադիոյին՝ օժանդակության համար: Հատկապես ուզում եմ ընդգծել «Համով Հայաստան» ծրագրի ներդրումը՝ ազգային խոհանոցի ավանդույթները տարածելու գործում»,-ասել է «Խոհարարական ավանդույթների զարգացման և պահպանման» հասարակական կազմակերպության նախագահ Սեդրակ Մամուլյանը։
Նրա խոսքով՝ հաղորդման հեղինակները շատ բան են անում հայկական բաղադրատոմսերի վեր հանման և տարածման գործում:
«Համով Հայաստանի» 1-ին թողարկումը հրապարակվել է 2016թ.-ի հունիսի 27-ին: Այս ընթացքում նկարահանվել է ավելի քան 70 թողարկում, որոնց ընթացքում ներկայացվել են աշխարհի տարբեր խոհանոցների բաղադրատոմսեր, ինչպես նաև հայկական խոհանոցի՝ տարբեր դարաշրջանների ուտեստներ:
