Չի բացառվում, որ ԱՄՆ-ն կրճատի ոչ միայն Հայաստանի ու 127 երկրի, այլև հենց ՄԱԿ-ի ֆինանսավորումը, Sputnik Արմենիայի հետ զրույցում նման սցենարը չբացառեց քաղաքագետ Սուրեն Սարգսյանը` մեկնաբանելով ԱՄՆ նախագահի հայտարարությունը։
Նշենք, որ ԱՄՆ-ն սպառնում է կրճատել 128 երկրին, այդ թվում` Հայաստանին տրամադրվող ֆինանսական օգնությունը։ Նախօրեին նման սպառնալիք է հնչել այդ երկրի նախագահ Դոնալդ Թրամփի շուրթերից։
«Գիտենք, որ ԱՄՆ-ն ՄԱԿ-ին ամենամեծ անդամավճար տվող երկիրն է։ Եվ ես չեմ բացառում, որ այստեղ էլ որոշակի փոփոխություններ լինեն` ֆինանսական միջոցների տրամադրման տեսանկյունից։ Պետք է սպասենք մինչև հաջորդ տարվա բյուջետային լսումներ, որպեսզի հասկանանք` նախագահ Թրամփի այդ հայտարարությունը միս ու արյուն կստանա, թե ոչ»,- ասաց Սարգսյանը։
Հիշեցնենք, որ երեկ ՄԱԿ-ի Գլխավոր վեհաժողովը հունիսի 21-ին բանաձև է ընդունել, որով չի ընդունել Երուսաղեմը որպես Իսրայելի մայրաքաղաք հայտարարելու ԱՄՆ-ի որոշումը:
Բանաձևի օգտին քվեարկել է 128 երկիր, որոնց թվում է նաև Հայաստանը, դեմ` 9, ձեռնպահ`35։
Ընդունված փաստաթղթի համաձայն՝ «ցանկացած գործողություն և որոշում, որը նախատեսում է Երուսաղեմի կարգավիճակի փոփոխություն, իրավաբանական ուժ չի ունենա և պետք է չեղարկվի»:
Արձանագրությանը կողմ են քվեարկել նաև Ռուսաստանը, Ուկրաինան, Ադրբեջանը։ Արձանագրությունը պատրաստվել էր Թուրքիայի և Եմենի կողմից։
ՄԱԿ-ում ԱՄՆ մշտական ներկայացուցիչ Նիկկի Հեյլին ասել է, որ ԱՄՆ-ն կհիշի այս օրը, երբ հերթական անգամ ՄԱԿ-ին պետք կլինի Նահանգների ներդրումը և երբ շատ երկրներ իրենց իսկ բարօրության համար դրամական օգնություն կհայցեն Միացյալ Նահանգներից։
