ԵՐԵՎԱՆ, 22 դեկտեմբերի — Sputnik. Երևանի և Մոսկվայի քաղաքապետները 2018-ից 2021 թվականն ընկած ժամանակահատվածի համար համագործակցության ծրագիր են ստորագրել, հայտնում է ՌԻԱ Նովոստին։
Տարոն Մարգարյանն ու Սերգեյ Սոբյանինը համագործակցության մասին պայմանավորվածություն են ձեռք բերել Մոսկվայում։
«Այսօր մենք ծրագիր ենք ստորագրում Երևանի պես հիանալի քաղաքի հետ։ Հուսով եմ, որ այս պայմանագրի ստորագրումից հետո կավելանան զբոսաշրջային հոսքն ու փոխադարձ ներդրումները», — նշել է Սոբյանինը։
Քաղաքապետների ուշադրության կենտրոնում են եղել առևտրատնտեսական, երիտասարդական քաղաքականության, կրթության, մշակույթի, սպորտի ոլորտներն ու երկու մայրաքաղաքների վարչական շրջանների միջև փոխգործակցությունը։
Հիմքում Մոսկվայի և ՀՀ-ի կառավարությունների միջև 1998 թվականին ստորագրած համաձայնագիրն է։ Փաստաթուղթը վերաբերում է առևտրատնտեսական, գիտատեխնիկական և մշակութային ոլորտներին։ Այսօր Մոսկվայից Հայաստան է մատակարարվում ալյումին, մեքենաշինության ծանր արտադրանք, հացազգիներ և էլեկտրական ավտոմեքենաներ։
Հայաստանից Մոսկվա` ոգելից և ոչ ոգելից խմիչք, թանկարժեք մետաղներ և դրանցից պատրաստած զարդեր, ինչպես նաև միրգ և ընկույզ։ 2017 թվականի առաջին կիսամյակում Հայաստանից Մոսկվա շուրջ 51 000 պարենամթերք է ներկրվել։
