ԵՐԵՎԱՆ, 22 Դեկտեմբեր — Sputnik. «Դիլիջան» ազգային պարկում իրականացված ապօրինի ծառահատումների մեղադրանքով հետախուզում է հայտարարվել ազգային պարկի տնօրենի նախկին տեղակալի նկատմամբ։
ՀՀ Քննչական կոմիտեն հարուցված քրեական գործի նախաքննության ընթացքում պարզել է, որ ազգային պարկի փոխտնօրեն Վաղինակ Վասիլյանը, տնօրենի՝ արձակուրդում գտնվելու ընթացքում՝ 2017թ. փետրվարի 15-ից մինչև ապրիլի 28-ը, իրականացրել է տնօրենի պարտականությունները։
Հենց այդ ընթացքում էլ անտառի տարբեր հատվածներում հայտնաբերվել է 471 ծառի ապօրինի հատման դեպք, որոնց արդյունքում բնությանը պատճառվել է 72 056 250 ՀՀ դրամի վնաս։
Վասիլյանը ոչ միայն դրանց մասին չի հայտնել իրավապահներին, այլև չի հաշվարկել բնությանը պատճառված վնասի չափը։
Նշենք, որ մինչ այս բացահայտումը, մամուլում արդեն տեղեկություններ էին հայտնվել Վասիլյանի որոշ գործողությունների մասին։ Մանսավորապես, որ Վասիլյանը, տնօրենի բացակայության ընթացքում, պարկի շուրջ 30 աշխատակիցից պահանջել է աշխատանքից ազատման դիմումներ ներկայացնել՝ սեփական կադրերին աշխատանքի ընդունելու նպատակով: Օգտվելով առիթից, որ տնտօրենի կնիքն այդ օրերին ժամանակավորապես ինքն է տնօրինում, փորձել է հապճեպորեն աշխատանքի տեսաղվորել իր մտերիմներին։
Ձեռք բերված ապացույցների համակցությամբ՝ 2017թ. դեկտեմբերի 21-ին որոշում է կայացվել՝ Վ. Վասիլյանին ՀՀ քրեական օրենսգրքի 308-րդ հոդվածի 2-րդ մասով որպես մեղադրյալ ներգրավելու մասին, նրա նկատմամբ որպես խափանման միջոց է ընտրվել կալանավորումը և հայտարարվել հետախուզում:
