ԵՐԵՎԱՆ, 22 դեկտեմբերի — Sputnik. ԱՄՆ ֆինանսների նախարարությունը պատժամիջոցներ է սահմանել 10 մարդու նկատմամբ, որոնց թվում է նաև Ռուբեն Թաթուլյանը, հայտնում է ՌԻԱ Նովոստին` հղում անելով ԱՄՆ ֆինանսների նախարարության մամուլի ծառայությանը:
Ֆինանսների նախարարության այս գործողություններն ուղղված են «անդրազգային հանցավոր խմբին ու օրենքով գողերին», նշվում է փաստաթղթում:
Ցուցակում ներառվել են 10, այսպես կոչված, «օրենքով գողեր»` Յուրի Պիչուգինը, Ռուբեն Թաթուլյանը, Ալիմժան Տոխտախունովը, Վլադիմիր Տյուրինը, Զախար Կալաշովը, Վասիլի Խրիստոֆորովը, Կամչիբեկ Կոլբաևը, Լաշա Շուշանաշվիլին, Վլադիսլավ Լեոնտևը և Գաֆուր Ռահիմովը:
Բացի այդ, ԱՄՆ պատժամիջոցները տարածվում են նաև Թաթուլյանին պատկանող «Վեսնա վ Սոչի» հյուրանոցի և «Նովի Վեկ Մեդիա» ՍՊԸ-ի վրա, որը գրանցված է Մոսկվայում:
Պատժամիջոցներն արգելում են Ամերիկայի քաղաքացիներին բիզնես վարել նշված մարդկանց և ընկերությունների հետ:
