ԵՐԵՎԱՆ, 21 դեկտեմբերի — Sputnik. «Իրականում» հաղորդման հերոսները պնդում են, որ Վիտալինա Ցիմբալյուկ-Ռոմանովսկայայի ներկայացուցիչ Էլինա Մազուրը Մոսկվայի մերսման սրահների ցանց ունի, որտեղ ինտիմ բնույթի ծառայություններ են մատուցում։
Մազուրը վտանգավոր անձնավորություն է, նա կարող է հաշվեհարդար տեսնել ցանկացած մեկի հետ, ով այս կամ այն պատճառով նրան ձեռք չի տա, ասել են ծրագրի հերոսուհիները, որոնք հաղորդմանը ներկայացել են դեմքն անճանաչելի դարձրած գրիմով և ելույթ են ունեցել կեղծ անունների տակ։
«Մերսման անվան տակ սրահում նաև այլ բնույթի ծառայություններ են մատուցվել։ Էլինան ոչ միայն իր աշխատակիցներին, այլև հաճախորդներին էր սպառնում։ Սրահում տեսախցիկներ են տեղադրված, որոնք ֆիքսում էին նրանց դեմքերը, իսկ նրանց մեջ նաև հայտնի մարդիկ կային», — պատմել է հերոսուհիներից մեկը, որը երկու տարի ադմինիստրատոր է աշխատել «մերսման սրահում»։
Նրա խոսքով` Մազուրը լավ հոգեբան է և մանիպուլյատոր։
«Նա բիզնեսը ձևակերպել է ոչ իր, այլ ուրիշների անունով, որոնց հետագայում «գցել» է։ Նա լուրջ կապեր ունի «վերևներում»», — ասել է հաղորդման մյուս մասնակիցը, որի ասածը հաստատել է ստի դետեկտորը։
Նրա խոսքով` Մազուրի անօրինական բիզնեսին աջակցում են բարձրաստիճան պաշտոնյաները։
Հաղորդավար Դմիտրի Շեպելևը հարցրել է` Վիտալինան հանցակի՞ց է, թե՞ ոչինչ չկասկածող զոհ, իսկապես նա՞ է վստահված անձ ընտրել մի կնոջ, որը երկար տարիներ հասարակաց տուն է ղեկավարում։
«Արդյո՞ք Վիտալինան գիտեր այդ բիզնեսի մասին։ Ի՞նչ է իրականում նրանց կապում», — հարցնում է նա։
Մերսման սրահի շենքում բնակվող Ռոբերտ Վարդանյանը հաստատել է, որ մի անգամ տեսել է ժողովրդական արտիստ Արմեն Ջիգարխանյանի նախկին կնոջը Մազուրի հետ սրահ մտնելիս։
Իրավաբան Եկատերինա Գորդոնի խոսքով` Ցիմբալյուկ-Ռոմանովսկայան ցանկացել է նրանից իրավաբանական օգնություն ստանալ, բայց անհայտ մեկի հետ խորհրդակցելուց հետո փոխել է մտադրությունը։ Նրա կարծիքով` Ջիգարխանյանի նախկին կինը Մազուրի ճնշման ու ազդեցության տակ է։
Միևնույն ժամանակ, նա ենթադրում է, որ Վիտալինան տեղյակ էր Էլինայի բիզնեսի մասին։
«Նա նման չէ շիկահեր հրեշտակի, որ բացարձակ չի հասկանում, թե ով է նրան պաշտպանում։ Եթե առաջիկայում Վիտալինան Մազուրից չազատվի, մենք նրա մասին վատ բաներ ենք մտածելու։ Համենայնդեպս, մենք բոլոր հիմքերը կունենանք մտածելու, որ նրանց միջև որևէ կապ, պայմանավորվածություն կա, և նրանք հանցակիցներ են», — ասել է նա։
Ջիգարխանյանի նախկին կնոջ Վիտալինա Ցիմբալյուկ-Ռոմանովսկայայի օգնական Էլինա Մազուրը որոշ ժամանակ առաջ հրաժարվել է Վիտալինայի պաշտոնական ներկայացուցչի իրավասություններից։ Որպես պատճառ նա նշել է բազմաթիվ դատական հայցերը։ Մազուրը երկար ժամանակ որպես Վիտալինայի պաշտոնական ներկայացուցիչ մեկնաբանություններ էր տալիս, հայտարարություններ անում և մամուլի ասուլիսներ հրավիրում։
