ԵՐԵՎԱՆ, 21 դեկտեմբերի — Sputnik. 2017թ-ը կամփոփվի 7%-ը գերազանցող տնտեսական ակտիվության ցուցանիշով, այսօր կառավարության նիստից հետո լրագրողների հետ զրույցում խոստացավ տնտեսական զարգացման և ներդրումների փոխնախարար Տիգրան Խաչատրյանը։
«Ընթացիկ տարվա 11 ամիսներն արդեն ամփոփված են՝ 7,3% աննախադեպ բարձր տնտեսական ակտիվության ցուցանիշով»,- ասաց փոխնախարարը։
Ընդ որում, նրա խոսքով, ամենամեծ աճը գրանցվել է արդյունաբերության, ծառայությունների և առևտրի ոլորտներում։
«Արդյունաբերությունն աճել է 12 տոկոսով, ծառայությունների և առևտրի դեպքում աճն ավելի քան 14 տոկոս է։ Եվ ուրախացնող է, որ դա տեղի է ունենում արտահանման բարձր ցուցանիշների ազդեցությամբ»,- ասաց նա։
Իսկ շինարարության ոլորտում 10 ամիս արձանագրված անկումից հետո, Խաչատրյանի խոսքով, վերջին մեկ ամսում արձանագրվել է թեև փոքր, բայց աճ։
Իսկ ահա գյուղատնտեսության ոլորտը միակն է, որտեղ անցյալ տարվա համեմատ աճ չի նկատվել։ Դրանում, սակայն, փոխնախարարը մեղադրում է եղանակային պայմաններին։
