ԵՐԵՎԱՆ, 21 դեկտեմբերի — Sputnik. Հայաստանում վերահսկողություն կսահմանվի գերիշխող դիրք ունեցող ապրանքային շուկաների նկատմամբ։ Այսօր կառավարության նիստում վարչապետ Կարեն Կարապետյանը նման հանձնարարություն տվեց ՀՀ տնտեսական մրցակցության պետական հանձնաժողովին նախագահին։
«Ամանորի առևտրի շրջանում մի քանի անգամ ավելանում է որոշակի ապրանքների պահանջարկը, ինչն իր մեջ պարունակում է գների անհիմն բարձրացման ռիսկեր։ Հաշվի առնելով սա և հանրության շրջանում առկա մտահոգությունները հանձնարարում եմ ՏՄՊՊՀ նախագահին Ամանորին ընդառաջ խստացնել վերահսկողությունը»,- ասաց վարչապետը։
Վերահսկողությունը կիրականացվի գների ամենօրյա մոնիթորինգի ձևով։ Վարչապետը հանձնարարեց խնդիրների դեպքում անհրաժեշտ միջոցներ ձեռնարկել։
