ԵՐԵՎԱՆ, 20 դեկտեմբերի — Sputnik. Պաշտոնյաների պատճառած նյութական վնասը հատուցելու են նրանց գերատեսչությունները։ Մի շարք օրենքներում («Հարկային ծառայության մասին», «Մաքսային ծառայության մասին», «Քաղաքացիական կացության ակտերի մասին») համապատասխան փոփոխությունների նախագիծը Հայաստանի խորհրդարանն ընդունեց այսօր երկրորդ ու վերջին ընթերցմամբ։
Հատուցումներն առայժմ վճարվում էին ընդհանուր բյուջեից։ Բայց այսուհետև օրինախախտումները հասցեական կպատժվեն։ Առաջին հերթին հատուցումը վճարելու է կոնկրետ տեսչությունը` աշխատակիցների խրախուսման իր հիմնադրամից (տեսչություններից 11-ն ունեն այդպիսի հիմնադրամներ)։ Ու միայն հիմնադրամի բացակայության դեպքում կամ միջոցների սղության պարագայում գումարը կվճարվի կառավարության պահուստային ֆոնդից։
Պետավտոտեսուչների սխալ տուգանքների համար այդպես է վճարում Ճանապարհային ոստիկանությունը։ Հիմա պատասխանատվություն կրելու այդ ձևն ուզում են կիրառել նաև այլ գերատեսչություններում։
