ԵՐԵՎԱՆ, 20 դեկտեմբերի — Sputnik. Խանութում վաճառվող միսը տեսքով հնարավոր չէ տարբերակել` էշի է, ձիու, թե՞ տավարի։ Այսօր լրագրողների հետը հանդիպմանն ասաց «Իրազեկ և պաշտպանված սպառող» ՀԿ նախագահ Բաբկեն Պիպոյանը։
«Ջլային կտրվածքով հնարավոր է շատ լուրջ մասնագետը կարողանա ենթադրություններ անել։ Բայց, իրականում, դա կարելի է պարզել միայն լաբորատոր պայմաններում։ Ուղղակի տարատեսակ մսերի վաճառքը պետք է բացառել պետական վերահսկողության միջոցով»,– ասաց Պիպոյանը։
Իսկ պետական վերահսկողությունից Բաբկեն Պիպոյանը դժգոհ է։ Նա հիշեցնում է, որ Սննդի անվտանգության պետական ծառայությունը, տարիներ շարունակ մսի շուկայի վերահսկողության մասին խոսելիս, հայտարարում էր Գումի և Մալաթիայի շուկաներում կատարված աշխատանքների մասին։ Սակայն ավանակի և ձիու մսի վաճառքի առաջին ահազանգերը հենց այդ շուկաներից էին։ Ընդ որում, հայտնաբերողը ոչ թե ՍԱՊԾ–ն, այլ ոստիկանությունը։
«Մսավաճառն անգամ, եթե ստանա ոչ թե կենդանու ամբողջական մարմինը, այլ արդեն մասնատված փոքր կտորներ, նա ևս չի կարող տարբերակել, թե ինչ կենդանու միս է մատակարարվել իրեն»,– ասում է Պիպոյանը` հավելելով, որ մսավաճառը պարտավոր է պահանջել համապատասխան փաստաթղթեր մսի յուրաքանչյուր խմբաքանակի համար։
Իսկ գնորդին սպառողի շահերի պաշտպանը խորհուրդ է տալիս գնելիս պահանջել տվյալ օրվա ամսաթվով ուղեկցող փաստաթղթերը, միևնույն ժամանակ հավելելով, որ սա ոչ թե բացառում է խաբված լինելու հնարավորությունը, այլ ընդամենը նվազեցնում դրա հավանականությունը, քանի որ հայտնի չէ, թե խանութում առկա մսի որ մասն է փորձաքննության ենթարկվել ու փաստաթղթավորվել։
![Бабкен Пипоян Бабкен Пипоян - Sputnik Արմենիա](https://cdn.am.sputniknews.ru/img/900/26/9002611_0:0:1600:1068_600x0_80_0_0_871dae2b18bcd3aa389654fda46baaa4.jpg)
Անդրադառնալով հարցին, թե ինչու հանկարծ հայաստանյան շուկայում հայտնվեց նման ծավալի էշի ու ձիու միս` Բաբկեն Պիպոյանը պատասխանեց. «Ասում են` քանի որ այս տարի մարզերում խոտի խնդիր է եղել, որոշ գյուղացիներ մորթում են անգամ փոքր ավանակներին ու ձիերին, որովհետև ձմռանը` խոտի դեֆիցիտի պայմաններում, դրանց պահել չեն կարող»,– ասում է նա։
Արդյունքում` ըստ Պիպոյանի` գյուղացու ծանր վիճակը, պետության անտարբերությունը, էժան ապրանք ձեռք բերելու համընդհանուր ձգտումը հնգեցնում են նրան, որ այսօր հասարակության մի ձգալի հատվածն ուղղակի վախենալով է առևտուր անում։