ԵՐԵՎԱՆ, 20 դեկտեմբերի — Sputnik. Ազգային վիճակագրության ծառայության ներկայացրած գնաճի ցուցանիշը գների միջինացված արդյունքն է, որտեղ, «Իրազեկ և պաշտպանված սպառող» ՀԿ-ի նախագահ Բաբկեն Պիպոյանի դիտարկմամբ, ներկայացված են ոչ միայն մարդու նվազագույն կենսապահովման զամբյուղի ապրանքները, այլ 500 անուն ապրանք, որոնց թվում` մետաղներ կամ, ասենք, կահույք, փողկապ, էլեկտատեխնիկա։
«Եթե փողկապի շուկայում մենք ունենում ենք գնանկում, կամ եթե մետաղների գները միջազգային շուկայում նվազում են, սա ուղղակիորեն նվազեցնում է նաև Հայաստանում գնաճի ցուցանիշը»,– ասում է Պիպոյանը` սրանով բացատրելով սպառողների նկատած գնաճի և պաշտոնապես ներկայացված ցուցանիշների անհամապատասխանությունը։
Ինչ վերաբերում է Ամանորի սեղանի արժեքի թանկացմանը, դրա վրա այս տարի հիմնականում ազդել է մսի և մսամթերքի, ինչպես նաև ալկոհոլային խմիչքների 10-12% գնաճը։
Ընդհանուր առմամբ, Պիպոյանի հաշվարկով, այս տարվա Ամանորի սեղանը շուրջ 10-12%-ով ավելի թանկ կարժենա, քան 2016-17-ինը։ Սպառողների շահերի պաշտպանը միաժամանակ ընդգծեց, որ աշխատավարձերի բարձրացում տարվա ընթացքում չի եղել։ Իսկ պետության ներկայացրած միջին աշխատավարձի բարձրացումը կրճատումների հետևանք է։
«Մի քանի աշխատողի գործատուն կրճատում է, ավելացած միջոցների հաշվին որոշ չափով բարձրացնում մյուս աշխատողների աշխատավարձերը։ Բայց արդյունքում սա ոչ թե սոցիալական վիճակի լավացում, այլ հակառակը` վատացում է»,– ասում է նա։
Ինչ վերաբերում է Նոր տարվա առիթով խանութներում հայտարարվող զեղչային ակցիաներին, Բաբկեն Պիպոյանն ուշադրություն է հրավիրում այն փաստին, որ դրանք հիմնականում նվերների տեսքով են`որոշակի քանակ գնելու դեպքում, մեկը տրվում է նվեր։ Այս պարագայում, նա խորհուրդ է տալիս չգայթակղվել նման առաջարկներով և ճիշտ հաշվարկել, թե տվյալ ապրանքից իրականում որքան է անհրաժեշտ։
