ԵՐԵՎԱՆ, 20 դեկտեմբերի — Sputnik. Air France ավիաընկերության ինքնաթիռը, որում գտնվել է 300 մարդ, վառելիքի արտահոսքի պատճառով արտակարգ վայրէջք է կատարել Պարագվայի օդանավակայանում, հաղորդում է ՌԻԱ Նովոստին` հղում անելով Ultima Hora պորտալին։
Ինչպես հաղորդվում է` ինքնաթիռը Բունես Այրեսից ուղևորվել է Փարիզ, սակայն 19։30–ին ստիպված է եղել արտակարգ վայրէջք կատարել Սիլվիո Պետիրոսիի օդանավակայանում` սրահում առաջացած կտրուկ հոտի պատճառով։ Վայրէջքն անցել է առանց պատահարների, ուղևորները մեկ այլ չվերթով կհասնեն Փարիզ։
«Մենք ձեռնարկել ենք բոլոր միջոցները, որոնք անհրաժեշտ են արտակարգ իրավիճակում։ Ուղարկել ենք կամավոր հրշեջների` ցանկացած միջադեպից խուսափելու համար, ինչպես նաև շտապօգնության մեքենաների», – մեջբերում է կայքը Dinac–ի ներկայացուցիչ Ռուբեն Ագլարի խոսքերը։
Boeing 777 ինքնաթիռը կմնա օդանավակայանում` միջադեպի պատճառները պարզելու համար։
