ԵՐԵՎԱՆ, 19 դեկտեմբերի — Sputnik. Հայաստանում թաքնվող «վրացի դիպուկահարները» տեսակապի միջոցով ցուցմունքներ կտան 2014 թվականի փետրվարին Մայդանում տեղի ունեցած դեպքերի առնչությամբ։ Այս մասին հայտնում են ուկրաինական ԶԼՄ-ները։
Լրատվամիջոցները հայտնում են, որ Հայաստանի տարածքում են թաքնվում իտալական «Հինգերորդ ալիքի» եթերում երեք տարի առաջ հեռարձակված սյուժեի երեք հերոսներից երկուսը` Կոբա Ներգաձեն ու Ալեքսանդր Ռևազիշվիլին։ Իտալական հեռուստաընկերությանը տված հարցազրույցում նրանք հայտնել են, որ 2014 թվականին Վրաստանի նախկին նախագահ Միխեիլ Սահակաշվիլու հրամանով մեկնել են Ուկրաինա` որպես դիպուկահարներ։
Նրանցից մեկը պնդել է, որ հակասությունների սրման պահին նրանց ջոկատին հրամայել են կրակել «Բերկուտի» աշխատակիցներին և ցուցարարներին, սակայն վրացական ջոկատը հրամանն ընդունել է որպես սադրանք և չի կրակել։
Կիևի գլխավոր հրապարակում` Նեզալեժնոստի մայդանում (Անկախության հրապարակ), 2013թ-ի նոյեմբերի 21-ին հավաքվել էին եվրաինտեգրման կողմնակիցները Նիկոլայ Ազարովի կառավարության այն հայտարարությունից հետո, թե Եվրամիության հետ ասոցացման մասին համաձայնագրի ստորագրումը դադարեցվել է։ Ավելի ուշ մայդանը դարձավ իրավապահ ուժերի և ծայրահեղականների ընդհարման էպիկենտրոն։ Ավելի քան 100 հոգու մահվան պատասխանատվությունը նոր ուկրաինական իշխանությունները գցեցին իրենց քաղաքական ընդդիմադիրի` նախկին նախագահ Վիկտոր Յանուկովիչի և «Բերկուտ» ՆԳՆ հատուկ ստորաբաժանման վրա։ Յանուկովիչը և «Բերկուտը» պնդում են, որ սպանությունների հետ առնչություն չունեն։ Պետական հեղաշրջումից հետո «Բերկուտ» հատուկ ստորաբաժանումը ցրվել է։
