ԵՐԵՎԱՆ, 19 դեկտեմբերի — Sputnik. Հայկական լոլիկները ՌԴ արտակարգ և լիազոր դեսպան Իվան Վոլինկինի կերած ամենահամեղ լոլիկներն են։ Նա այս մասին այսօր հայտնեց լրագրողներին` ամփոփելով անցնող տարին։
Հայաստանի ու Ռուսաստանի տնտեսական համագործակցության առաջնային ուղղությունների մասին խոսելիս` նա նաև անդրադարձավ Հայ-ռուսական ներդրումային հիմնադրամին` ընդգծելով, որ առաջնահերթություններն արդեն սահմանված են։
«Հայաստանի ղեկավարությունն էլ է դրանք սահմանել։ Դրանց շարքում են գյուղատնտեսությունը, զբոսաշրջությունը, ՏՏ ոլորտը։ Կարծում եմ` սրանք հիմնական ոլորտներն են, որոնք մեր համագործակցության մեջ առաջնային են լինելու։ Տնտեսության այդ ոլորտները կխթանեն Հայաստանի տնտեսության զարգացումը։ Օրինակ` ինչու՞ գյուղատնտեսությունը։ Որովհետև Հայաստանն այնպիսի բնական պաշարներ ունի, որոնք թույլ են տալիս աշխարհում բացառիկ գյուղատնտեսական մթերք արտադրել», — ասաց Վոլինկինը։
Նա նշեց, որ երբ մարդը Ռուսաստանում շուկա է գնում ու հարցնում` ծիրանը որտեղի՞ց է, բոլորը պատասխանում են` Հայաստանից։ Նույնիսկ եթե, ասենք, Կրասնոդարի երկրամասից են բերել։
«Ինչո՞ւ է այդպես։ Որովհետև դա ապրանքանիշ է… Ես ոչ մի տեղ ավելի համեղ լոլիկներ չեմ կերել, քան Հայաստանում։ Հիանալի մթերք է։ Հայաստանն ահռելի գյուղատնտեսական ներուժ ունի», — հավելեց ռուս դեսպանը։
Նա կարծում է, որ Հայաստանում կարելի է զարգացնել զբոսաշրջության ցանկացած ճյուղ` բնապահպանական, պատմական, գաստրոնոմիական։
«Եվ, իհարկե, մարդկանց վերաբերմունքը։ Բոլորս գիտենք, որ Հայաստանի ամենամեծ հարստությունը մարդիկ են, յուրաքանչյուր հյուրին ընդունում է ամբողջ հոգով ու ջերմությամբ», — ընդգծեց նա։
Խոսելով ՏՏ ոլորտի մասին` Վոլինկինը նշեց, որ հայկական մասնագետները հայտնի են ամբողջ աշխարհում։ Նրանք աշխատում են շատ երկրներում ու հայտնի ընկերություններում, քանի որ «հայերի գլուխը լավ է աշխատում»։
