ԵՐԵՎԱՆ, 19 դեկտեմբերի — Sputnik. ԱՊՀ երկրների հատուկ ծառայությունների աշխատակիցներին հաջողվել է կանխել ահաբեկիչների հարձակումը ԱՊՀ արտասահմանյան դիվանագիտության ներկայացուցչությունների վրա։ Այս մասին հայտնել է ՌԴ ԱԴԾ ղեկավար Ալեքսանդր Բորտնիկովը։
«Ռուսաստանում և Կենտրոնական Ասիայի երկրներում մի շարք ահաբեկչություններ են կանխվել, չեզոքացվել է արտերկրում մեր պետությունների դիվանագիտական ներկայացուցչությունների վրա գրոհայինների հարձակման վտանգը», — ԱՊՀ հատուկ ծառայությունների և անվտանգության մարմինների ղեկավարների խորհրդի նիստում ասել է Բորտնիկովը։
Նա այլ մանրամասներ չի հայտնել, բայց նշել է, որ ՌԴ ԱԴԾ-ն ԱՊՀ գործերով գործընկեր-երկրներին է փոխանցել 36 հազար հաքերական հարձակումների սպառնալիքի մասին տեղեկությունը։
Օրեր առաջ ԱԴԾ աշխատակիցները Սանկտ Պետերբուրգում հատուկ գործողություններ էին իրականացրել քաղաքում ահաբեկչություն նախապատրաստող ԻՊ ահաբեկչական խմբավորման (Ռուսաստանում արգելված կազմակերպություն) գրոհայիններից յոթին բերման ենթարկելու ուղղությամբ։
Չարագործները ծրագրել էին դեկտեմբերի 16-ին ահաբեկչություն իրականացնել մահապարտ-ահաբեկչի օգնությամբ, որը պետք է իրեն պայթեցներ Կազանի տաճարում։ Բացի այդ, նրանք ծրագրել էին պայթյուններ իրականացնել այն վայրերում, որտեղ մեծ բազմություն կա։