Անի Լիպարիտյան, Sputnik
Մի գեղեցիկ օր Հայաստանի Արմդայվինգ սուզորդների ակումբի անդամները որոշեցին լեգենդար System of a Down խմբին նվիրված քանդակ ստեղծել։ Նրանք դիմեցին քանդակագործ Հայկ Թոքմաջյանին։
Խմբի երաժշտությունը լավն է, նույնիսկ` կատարյալ, կարծում է Հայկը։
«Չի ստացվում մի բան ստեղծել, որ պատվանդան հիշեցնի կամ նրանք հերոսական պատկեր ունենան… Նրանք բոլորովին այլ են, ինչպես և նրանց երաժշտությունը։ Քանդակը թռիչքի, կյանքի տեսք կունենա», — Sputnik Արմենիային պատմեց քանդակագործը։
Նրա խոսքով` Սևանը հայերի համար ասես ծով լինի, այդ պատճառով էլ շատ է ուզում քանդակը հենց այնտեղ տեղադրել։ Հայկն արդեն հասցրել է խոսել ու պայմանավորվել սուզորդների հետ, որոնք որոշել են` որտեղ պետք է տեղադրվի քանդակագործի ստեղծագործությունը։
«2 մետրանոց քանդակ է լինելու, որը տեղադրվելու է 5-6 մետր խորության վրա։ Արդեն պայմանավորվածություն կա Հայաստանի դայվինգի ֆեդերացիայի հետ… Առանց նրանց օգնության հաստատ հնարավոր չի լինի գործը գլուխ բերել։ Իսկ նրանք առաջարկում են քանդակը շատ խորը չտեղադրել, ես կողմ եմ այդ գաղափարին», — նշեց նա։
Հայկը ավելացրեց, որ քանդակը բետոնից է լինելու և արտահայտելու է հայերի սիրած ռոք-խմբի հույզերը։
Հարցին` արդյո՞ք զբոսաշրջիկները հնարավորություն կստանան սուզվելու ու տեսնելու Հայկի անսովոր քանդակը, նա դրական պատասխանեց։
«Այդ խումբը երկրպագուների ահռելի բանակ ունի։ Կարծում եմ` նրանք հաճույքով կգան ու կնայեն։ Իհարկե, կան մարդիկ, որոնք լողալ չգիտեն։ Կարծում եմ` մոտակայքում պաստառ կլինի հատուկ այն մարդկանց համար, որոնք չեն կարող սուզվել», — ասաց քանդակագործը` ընդգծելով, որ SOAD-ը հենց այն խումբն է, որը մեծ ներդրում է ունեցել երաժշտական աշխարհի զարգացման գործում։
Հայկն ավելացրեց, որ կուզեր գաղափարը կյանքի կոչել 2018 թվականի ամռանը, քանի որ քանդակը պատրաստ կլինի մինչև այս տարեվերջ։ Սակայն երազանքի իրականացման ճանապարհին որոշ ֆինանսական խնդիրներ են առաջանում։
«Ես այլ հայտնի մարդկանց չեմ ստեղծելու, միայն System Of a Down-ին», — նշեց Sputnik Արմենիայի զրուցակիցը։
Հայկը նաև հայտնեց, որ երաժիշտներին կտեղեկացնեն քանդակի մասին։
Ինչպես տեղեկացրին Արմդայվինգի ակումբից, վերջնական որոշում առայժմ չկա։ Բնապահպանության նախարարությունը դեռևս վերջնական պատասխան չի տվել։ Վերջնական համաձայնություն չկա նաև երաժիշտներից, և նաև վերջանական որոշված չէ, թե ինչ տեսք կունենա քանդակը։
