ԵՐԵՎԱՆ, 16 դեկտեմբերի — Sputnik. Հայկական իշխանություններն ուզում են իրանցի զբոսաշրջիկներին ցույց տալ, որ Հայաստանում լիցքաթափվելուց բացի, տեսնելու և ուտելու շատ բան կա։ Տեղեկատվական նոր կենտրոններում կպատմեն՝ ինչ է կարելի նայել և ուտել մեր երկրում։
2017 թվականի օգոստոսից Հայաստանն ու Իրանը առանց վիզայի ռեժիմի են անցել։ Այդ պատճառով իրանցի զբոսաշրջիկների թիվը մեզ մոտ աճել է․ հունվարից սեպտեմբեր ընկած ժամանակահատվածում ավելի քան 180 հազար իրանցի է եկել Հայաստան, և այս թիվը 12%-ով գերազանցում է 2016 թվականի նույն ամիսների ցուցանիշը։
Իրանցիները մեզ մոտ գալիս են ռոք-համերգների համար, որոնք վաղուց արդեն ցածրորակ զվարճանք չեն համարվում։ Նաև ֆիլհարմոնիա են գալիս, թեև ոչ շատ, բայց տեղացիներն էլ շատ հաճախ չեն գնում այնտեղ։ Զրադաշտականների ավտոբուսներն էլ Գառնու հեթանոսական տաճար են գալիս մարտին։
I դարի այդ տաճարը խորհրդային զբոսավարները ներկայացնում էին որպես ԽԱՀՄ-ում պահպանված եզակի հեթանոսական տաճարներից մեկը։ Իսկ զրահադաշտականները գիտեն այն որպես Միհրի՝ Արևի աստծու տաճար, որին հայերը Մհեր են անվանում։
Լավ բաներ շատ կան։ Ու ամեն ինչն ինքնահոսի չմատնելու համար իշխանությունները որոշել են` եթե մշակույթով հետաքրքրվող զբոսաշրջիկներ ենք ուզում, ցույց տանք նրանց մեր մշակույթը։ Ինչպե՞ս և ո՞րտեղ։
Ուղին ցույց տվեց Կարեն Կարապետյանը, երբ երեկ իրանական սահմանին բացեց Մեղրի ազատ տնտեսական գոտին։ Գրասենյակներն ու գործարաններն այստեղ նոր պետք է հայտնվեն։ Սակայն տեղեկատվական կետը զբոսաշրջիկների համար արդեն բաց է։ Այստեղ մաքուր պարսկերենով կպատմեն՝ ուր արժի գնալ ու ինչ տեսնել, ինչ ուտել ու, հնարավոր է, որտեղ չափավոր խմել։ Կպատմեն քրիստոնեական տաճարների ու մուսուլմանական մզկիթների, նաև Գորիսի ու Գյումրու հին ճարտարապետության մասին։
«Մենք չենք սահմանափակվում միայն մշակութային հուշարձաններով։ Բուկլետներում ամեն ինչի մասին կպատմենք։ Այդ թվում ՝ զվարճանքների… Նայած ինչ զվարճանքների, իհարկե», — ճշտեց Հայաստանի զբոսաշրջության զարգացման հիմնադրամի տնօրեն Արա Խզմալյանը։
Զբոսաշրջիկներին կպատմեն, որ Հայաստանը միայն Երևանը չէ։ Կպատմեն մարզերի բազմազանության մասին, որոնց թվում է նաև իրանական կողմին շատ մոտ գտնվող սահմանամերձ Մեղրին։ Այնտեղ կարելի է, օրինակ, տեսնել Մեղրիի սուրբ Հովհաննես միջնադարյան եկեղեցին՝ արևելյան կամարներով։
Զբոսաշրջիկներին անհայտ Հայաստանը ցույց տալու համար եկող տարում Հիմնադրամը պատրաստվում է կենտրոններն ընդլայնել մարզերում։ Այնտեղ ոչ միայն լուսավորելու են զբոսաշրջիկներին, այլ իրենք էլ են «լուսավորվելու»։
«Մեր աշխատակիցներն ուսումնասիրելու են տեսարժան վայրերը տեղական իշխանությունների ու կամավորների հետ։ Այդ տեսարժան վայրերի հիման վրա զբոսաշրջիկների համար երթուղիներ են կազմվելու», — հայտնեց Խզմալյանը։
Իրանական տուրօպերատորներին արդեն պատմել են նորույթի մասին։ Այդ պատճառով որոշ ավտոբուսներ սահմանամերձ Արաքսը հատելիս ոչ թե աջ են թեքելու՝ դեպի անցակետ, այլ ձախ՝ դեպի տեղեկատվական կենտրոն։
Առաջին «բարի գալուստը», ընդ որում` նրանց մայրենի լեզվով, իրանցի հյուրերը կլսեն հենց այնտեղ։
