ԵՐԵՎԱՆ, 16 դեկտեմբերի — Sputnik. ԱՄՆ Ֆլորիդա նահանգում կեղծ ամուսնությունների կազմակերպմամբ զբաղվող հանցախումբ է բացահայտվել։ Խմբի հիմնական անդամները ամերիկացիներ Վիլյամ Մեթյու Թեքսն ու Էյփրիլ Քլինն Մուրն են, որոնք մեղադրվում են նախկին ԽՍՀՄ հանրապետություններից ԱՄՆ արտագաղթածների և այդ երկրի քաղաքացիների միջև կեղծ ամուսնություններ կազմակերպելու մեջ։ Այս մասին տեղեկացնում է ԱՄՆ արդարադատության նախարարության պաշտոնական կայքը:
Ձերբակալվածների թվում նաև նախկին ԽՍՀՄ քաղաքացիներ կան, մասնավորապես` Ադրբեջանի քաղաքացի Խագան Մուշֆիգ Օղլու Նաբիլին, Ուզբեկստանի քաղաքացի Զաֆար Բաղրամովիչ Եդիգարովը, Ղազախստանի քաղաքացի Վալերի Ցոյը, ՌԴ քաղաքացի Մարիա Ռոգաչովան և Ադրբեջանի քաղաքացի, ազգությամբ հայ Սվետլանա Վլադիմիրովնա Շախրամանյանը։ Ֆլորիդայում բացահայտված կեղծիքին մասնակցելու համար նրանցից յուրաքանչյուրին սպառնում է մինչև 5 տարվա ազատազրկում։
Մինչ այդ, նույն գործի շրջանակում արդեն իսկ ձերբակալվել էին ՌԴ քաղաքացի Դենիս Յակովլևն ու ամերիկացի Մեգան Տուլեն, որոնք խոստովանել են, որ 2015-16թթ ընթացքում շուրջ 100 մարդու կեղծ ամուսնություններ են գրանցել։ Ըստ ԱՄՆ իրավապահների` Յակովլևն ասել է, որ յուրաքանչյուր գործարքից 1000-2000 դոլար գումար է ստացել, իսկ ամուսնացող ամերիկացիներից յուրաքանչյուրը` 10-20 հազար դոլար։
