ԵՐԵՎԱՆ, 15 դեկտեմբերի — Sputnik. Հենրիխ Մխիթարյանը մեծ պրոֆեսիոնալ է, աշխատասեր, հայկական ֆուտբոլին և առհասարակ ֆուտբոլին նվիրված, այսօր լրագրողներին ասաց Հայաստանի ֆուտբոլի ֆեդերացիայի նախագահ Ռուբեն Հայրապետյանը։
«Կարծում եմ` Մխիթարյանն այն ֆուտբոլիստն է, որը չի կարող երկար մնալ այս իրավիճակում: Բոլորդ էլ հասկանում եք, որ այստեղ խնդիրը Հենրիխի ֆիզիկական վիճակն ու մարզավիճակը չեն։ Պատճառն այլ է: Կարծում եմ` մոտ ժամանակներս ինքս էլ հայտարարություն կանեմ` որոշ բաներ ուսումնասիրելուց և ճշտելուց հետո»,- ասաց նա:
ՀՖՖ նախագահը վստահեցրեց, որ Մխիթարյանը դեռ կուրախացնի բոլորիս։
Նշենք, որ բրիտանական The Mirror-ն այսօր գրել էր, որ «Մանչեսթեր Յունայթեդի» գլխավոր մարզիչ Ժոզե Մոուրինյոն պատրաստ է ամռանը հրաժարվել Հենրիխ Մխիթարյանից և նրա փոխարեն պայմանագիր կնքել Մեսութ Օզիլի հետ։
Լուրեր են պտտվում նաև, որ Մխիթարյանը կարող է տեղափոխվել «Ինտեր» կամ վերադառնալ «Բորուսիա»։
