ԵՐԵՎԱՆ, 15 դեկտեմբերի — Sputnik. Իրանի ժողովրդի բարեկեցությունն օգտակար է Հայաստանին, ասել է ՀՀ նախագահ Սերժ Սարգսյանը «Արմենիա» հեռուստաալիքին տված հարցազրույցում։
«Իրանը մեզ բարեկամ երկիր է, Իրանի հետ մենք շփվելու հազարամյակների փորձ ունենք», — ասել է Սարգսյանը` մեկնաբանելով հայ-իրանական հարաբերությունների վրա ամերիկյան պատժամիջոցների ազդեցությունը։
Նրա խոսքով` Հայաստանին օգտակար է Իրանի հետ միջուկային համաձայնագիրը և ցանկալի է, որպեսզի այդ համաձայնագրի դրույթներն իրականացվեն:
«Ի վերջո, կարծում եմ` մենք պետք է մտածենք հետևյալ կերպ. որքանով բարեկեցիկ ապրի իրանցի ժողովուրդը, այնքանով դա օգտակար է Հայաստանին: Օգտակար է, քանի որ կաշխուժանա առևտուրը, կաշխուժանան տուրիստական հոսքերը, կաշխուժանան մեր շփումները: Ի վերջո, ցանկացած հանրություն բաղկացած է անհատներից, սուբյեկտներից և որքանով բարեկեցիկ ապրեն այդ անհատները, այդ սուբյեկտները, այդքանով նաև բարեկեցիկ կլինի ամբողջ հանրությունը», — ասել է Սարգսյանը։
Նրա խոսքով` այսօրվա առևտրաշրջանառության ծավալները կողմերին չեն բավարարում, այսօրվա տնտեսական համագործակցության մակարդակը երկու երկրներին չի բավարարում, այստեղ հսկայական ներուժ կա և այդ հսկայական ներուժի իրացման համար անհրաժեշտ է Իրանում կայունություն, խաղաղություն։
«Այդ դեպքում այդ կայունության և խաղաղության պտուղները կարող ենք քաղել նաև մենք»,- ասել է Սարգսյանը: