ԵՐԵՎԱՆ, 14 դեկտեմբերի — Sputnik. ԵՄ-ի հետ նոր համաձայնագիրն առանձին գործընթաց է, իսկ մուտքի արտոնագրերի ազատականացումը` այլ գործընթաց է, «Արմենիա» հեռուստաընկերության եթերում ասել է ՀՀ նախագահ Սերժ Սարգսյանը։
«Իհարկե, դրանք, ամենայն հավանականությամբ, պայմանավորված են իրարով, բայց ստորագրել նոր համաձայնագիր` չի նշանակում, որ ինքնին սկսվեց վիզաների կամ մուտքի արտոնագրերի ազատականացման գործընթացը»,- նշել է նա:
Նրա խոսքով, հաջորդ տարվա գուցե առաջին կեսին կամ մինչ այդ երկխոսությունը կսկսեն։
«Այստեղ ևս բազմաթիվ խնդիրներ կան, դա տևական պրոցես է։ Եթե լավ աշխատենք, կարծում եմ, 2-3 տարիների ընթացքում հնարավոր կլինի հասնել վերջնանպատակին»,- ասել է Սարգսյանը:
Հայաստանը ԵՄ-ի հետ համապարփակ և ընդլայնված համագործակցության մասին համաձայնագիր ստորագրեց նոյեմբերի 24-ին Բրյուսելում անցկացված «Արևելյան գործընկերության» գագաթնաժողովում։
