ԵՐԵՎԱՆ, 14 դեկտեմբերի — Sputnik. Վաշինգտոնը RT հեռուստաալիքն ու Sputnik գործակալությունը որպես սպառնալիք է դիտարկում, և այստեղ խոսքի ազատության հարց է առաջանում: Այս մասին այսօր ավանդական տարեվերջյան ամենամյա մեծ մամուլի ասուլիսի ժամանակ ասաց Ռուսաստանի Դաշնության նախագահ Վլադիմիր Պուտինը։
Ասուլիսի ժամանակ ՌԴ նախագահին հարց ուղղեց ABC հեռուստաալիքի լրագրողը՝ անդրադառնալով ԱՄՆ նախագահական ընտրություններից առաջ Ռուսաստանի իշխանությունների և Դոնալդ Թրամփի կողմնակիցների կապին:
Պուտինն ի պատասխան ասաց. «Այդ ամենը հորինվածք է, Թրամփի ընդդիմախոսներն են հորինել»։
«Ի՞նչ է, պետք է ընդհանրապես արգելե՞լ ցանկացած շփում։ Մեր դեսպանին մեղադրում էին, թե նա ինչ-որ մեկի հետ է հանդիպել։ Բայց դա ամբողջ աշխարհում ընդունված պրակտիկա է, սակայն ԱՄՆ-ում դա «լրտեսամոլուցքի» բնույթ է ստանում։ Այդ ամենը հորինել են մարդիկ, որոնք ընդդիմության մեջ են։ Մարդիկ անում են դա՝ առանց հասկանալու, որ վնաս են հասցնում երկրի ներքաղաքական իրավիճակին», — ասաց նա։
Պատասխանելով Թրամփի՝ ԱՄՆ նախագահի պաշտոնում կատարած աշխատանքի մասին հարցին` Պուտինն ասաց, որ ամերիկացի գործընկերոջ աշխատանքը գնահատելն իր գործը չէ։
«Այդ գործը պետք է անեն նրա ընտրողները։ Սակայն կարճ ժամանակահատվածում մենք մեծ ձեռքբերումներ ենք տեսնում։ Շուկաներն աճել են, նշանակում է՝ ներդրողները վստահում են Թրամփին։ Դրանք օբյեկտիվ գործոններ են»,- ասաց նա։
Պուտինի խոսքով` Թրամփն ի վիճակի չէ բարելավել Ռուսաստանի հետ հարաբերությունները «հայտնի սահմանափակումների պատճառով»։ Սակայն նա հույս հայտնեց, որ ի վերջո կհաջողվի բարելավել երկու երկրների հարաբերությունները, քանի որ դա երկու երկրի շահերից է բխում։
