ԵՐԵՎԱՆ, 14 դեկտեմբերի — Sputnik. Հայաստանի Հանրապետության` ի դեմս ՀՀ ֆինանսների նախարարության, Գերմանական Վերականգնման Վարկերի Բանկի (KfW) միջև առաջիկայում նախատեսվում է ստորագրել 18,5 մլն եվրո գումարի չափով վարկային համաձայնագիր։
Հարցին հավանություն տալու մասին որոշումը կայացվեց այսօր ՀՀ կառավարության նիստում։
Նշված գումարով նախատեսվում է ընդլայնել «Կումայրիի» ոռոգման ջրատար թունելը, կառուցել խողովակաշարի համակարգը, որով պետք է ապահովվի 740 հեկտար տարածքի ոռոգումը։
Ի դեպ, սա արդեն ծրագրի երկրորդ փուլն է, առաջինը 50 մլն եվրոյի շրջանակներում իրականացվում է 2014 թ.–ից սկսած։
Նոր՝ 18.5 մլն-անոց վարկը տրամադրվում է մինչև 15 տարի մարման ժամկետով, որից մինչև 5-ը՝ արտոնյալ։ Մայր գումարը մարվելու է՝ սկսած 2023թ. մայիսի 15-ից և ավարտվելու՝ 2033թ.-ին։