ԵՐԵՎԱՆ, 13 դեկտեմբերի — Sputnik. Հայաստանի արևային նոր էլեկտրակայանը, որ 1 ՄՎտ հզորություն ունի, բացվեց Արմավիրի մարզի Շենիկ համայնքում։
Հանդիսավոր բացմանը ներկա էին բարձրաստիճան պաշտոնյաներ, այդ թվում` ՀՀ վարչապետ Կարեն Կարապետյանը։
Ինչպես նշեց «Շտիգեն» ընկերության (կայանի նախագծող) հիմնադիր-տնօրեն Հայկ Շեկյանը, Հայաստանում մի քանի տարի հետո նման հզորությամբ կայանները Հայաստանի համար սովորական են լինելու։
«Ես համոզված եմ, որ այս կայանը դեռ սկիզբն է։ Մեկ-երկու տարի անց 1 ՄՎտ կայաններին նայելու ենք այնպես, ինչպես այսօր նայում ենք մեկ արևային մարտկոցին», — ասաց Շեկյանը։
Պետությունը ևս աջակցել է արևային կայանի ներդրողներին` թույլ տալով էներգիան վաճառել սովորականից բարձր սակագնով։ Դրանից հետո մի քանի հայ և արտասահմանյան գործարարներ հետաքրքրություն են դրսևորել շինարարության նկատմամբ։
Ինչպես նշեց կայանի սեփականատեր Վարդան Վարդանյանը, նախագծի արժեքը կազմել է 850 հազար դոլար։
Պետությունը ձեռնտու սակագին է սահմանել մինչև 1 ՄՎտ հզորություն ունեցող 10 կայանի համար: Քվոտան արդեն լրացվել է, շինարարությունն ընթանում է։ Նրանց, ովքեր հասցրել են հայտ ներկայացնել, 1 ԿՎտ-ի դիմաց առաջարկել են 42,6 դրամ, առանց ԱԱՀ-ի, կամ մյուս կայանների միջին սակագնից մոտ կրկնակի բարձր։
Կայանի 1.6 հա մակերես ունեցող տարածքում տեղադրված է 3 124 ֆոտովոլտային վահանակ։
Երկրի էներգետիկ համակարգում արևային և հողմային հզորությունները դեռևս 1% չեն կազմում, բայց ևս մի քանի արևային էլեկտրակայաններ կառուցման փուլում են։
