ԵՐԵՎԱՆ, 13 դեկտեմբերի — Sputnik. ԽՍՀՄ ժողովրդական արտիստ Արմեն Ջիգարխանյանի կինը` Վիտալինա Ցիմբալյուկ–Ռոմանովսկայան, արտիստի հաշվից 13 մլն ռուբլի է հանել, «Կոմսոմոլսկայա պրավդա» թերթին տված հարցազրույցում ասել է Ջիգարխանյանի փաստաբան Եվգենի Պարֆյոնովը։
«Մինչ Արմեն Բորիսովիչը արձակուրդում էր, Վիտալինան նրա հաշվից 4 մլն ռուբլի (67 հազար դոլար) է հանել։ Նա առանց ամուսնու իմացության յուրացրել է փողերի մի մասը, որոնք վաստակել էին Ստարոկոնյուշեննի նրբանցքում գտնվող բնակարանի վաճառքից. այն դերասանը ստացել էր նախկին կնոջ` Տատյանա Վլասովայի հետ ունեցվածքը կիսելու ժամանակ։ Ակնհայտ է, որ Վիտալինան ամուսնալուծության էր պատրաստվում», – ասել է Պարֆյոնովը։
Ցիմբալյուկի ներկայացուցիչ Էլինա Մազուրը պնդում է, որ բնակարանի կեսը վաճառվել է տանից Արմեն Բորիսովիչի նախկին կնոջը չհանելու և նրա համար ավելորդ խնդիրներ չստեղծելու համար։ Բնակարանի այդ մասնաբաժինը շուկայական գներով կազմում է մոտ 20 մլն ռուբլի, սակայն վաճառվել է 7 մլն 900 հազար ռուբլով։
«Այն ընկերությունը, ում այժմ պատկանում է բնակարանի կեսը, փաստորեն, կանխիկացրել է գումարը։ Ընկերությունն անկանխիկ գումար ուներ` պարզ չէ, թե ինչ փող էր դա, մաքուր էին արդյո՞ք, թե ոչ։ Ընկերությունն այդ գումարը փոխանցել էր Արմեն Բորիսովիչի հաշվեհամարին։ Վիտալինան գումարը կանխիկացրել էր։ Ըստ մեր ենթադրությունների`նա վերադարձրել է գումարն այդ մարդկանց, և այժմ բնակարանի կեսը ձևական մի գնորդի է պատկանում», – «ԿՊ»–ին է ասել Ջիգարխանյանի ընկեր Արթուր Սողոմոնյանը։
Նրա խոսքով` այս վարկածն այժմ ստուգում է Քննչական կոմիտեն։ Հուսով ենք` քրեական գործ կհարուցվի «խարդախություն» հոդվածով։
