ԵՐԵՎԱՆ, 13 դեկտեմբերի — Sputnik. Լեհական Կելցե քաղաքում բացվել է հայկական ժառանգության ցուցահանդես։ Ինչպես հաղորդում է լեհական Gazeta Wyborcza-ի տեղի խմբագրությունը, ցուցահանդեսի ձգողականության կենտրոնը դարձել է հին թերթերի կրպակը, որը վերջերս տեղադրվել է Հին քաղաքի կենտրոնում գտնվող շուկայի հրապարակում։ Կրպակը վերականգնել են ճիշտ նույն ձևով, ինչպիսին եղել է հայկական Քաբաբչի ընտանիքի մոտ։ Նրանց չորս կրպակները Կելցեն զարդարել են 1910թ-ից, երբ քաղաքը դեռ Ռուսական կայսրության կազմում էր, մինչև 1945թ-ը, երբ Լեհաստանում սոցիալիզմ հաստատվեց։
Զենոն և Մարիա Քաբաբչիների գործի մասին հիշել է Gazeta Wyborcza-ի ընթերցողներից մեկը, որ նամակ է ուղարկել խմբագրություն։ Նամակը տեսել է գավառագետ Ռաֆալ Զամոյսկին` քաղաքի Ներդրումների ընկերությունից։
«Ես սկսեցի այս նախագիծն առաջարկել ամենուրեք, որտեղ քննարկվում էին մեր քաղաքի կենտրոնի բարեկարգման գաղափարները։ Ի վերջո, մասնավոր ընկերություններից մեկը համաձայնեց հին ոճով պատրաստել երեք կրպակի ճշգրիտ պատճենը», — ասել է նա։
«Դա լավ առիթ է հիշելու, թե հայ համայնքն ինչ ավանդ է ունեցել մեր մշակույթի ձևավորման գործում», —ցուցահանդեսի բացման ժամանակ նշել է Կելցեի ժողովրդական թանգարանի տնօրեն Ռոբերտ Կոտովսկին։
Քաղաքում շատ են գեղեցիկ (և ավելի հին) հուշարձանները, բայց շիլան յուղով չես փչացնի, որոշել են քաղաքի բնակիչները։
