ԵՐԵՎԱՆ, 13 դեկտեմբերի — Sputnik. «Բարձրագույն կրթության մասին» ՀՀ օրենքի նոր նախագիծը երկրի ու ոլորտի համար հեղափոխական նշանակություն ունի, այսօր լրագրողներին ասաց ՀՀ կրթության և գիտության նախարար Լևոն Մկրտչյանը։
Նրա խոսքով` արդեն արդարադատության նախարարության կայքում կարելի է ծանոթանալ նոր օրենքի ամբողջական տեքստին։
«Օրենքը շատ լուրջ հիմնադրույթներ է պարունակում իր մեջ, այն արմատական փոփոխություն է բերում բարձրագույն կրթության փիլիսոփայության մեջ: Սկզբունքային կարևոր մի հարց կա այստեղ՝ կենտրոնում ուսանողն է, որը պետք է բակալավրական կրթության համար ստանա, ասենք, 250 միավոր, և դա պետք է ստանա ազատ շրջագայության միջոցով», – ասաց նախարարը` մինչ օրինագծի քննարկման սկիզբը։
Եվս մեկ փոփոխություն տեղի կունենա բուհերի ֆինանսավորման հարցում, ասաց Մկրտչյանը։ Այդ բարեփոխումը ենթադրում է, որ պետական ու մասնավոր ուսումնական հաստատությունների միջև գումարը հավասարաչափ կբաշխվի։
Բացի այդ` փորձ է արվելու գնալ մեկ այլ ձևաչափի՝ ունենալ նախաբակալավրիատ. դրանք մասնագիտական բակալավրիատներն են: Փորձ է արվելու սինթեզել միջին մասնագիտական ու կարճաժամկետ բակալավրիատը, որից հետո երիտասարդը կկարողանա ստանալ կոնկրետ մասնագիտություն», – ասաց Մկրտչյանը` հավելելով, որ օրենքը ընդունելուց հետո երեք տարվա ընթացքում մասնագետներին քրտնաջան ու բարդ աշխատանք է սպասվում։
Իր հերթին «Հանուն գիտության զարգացման» նախաձեռնության անդամ Հայկ Զաքարյանը նշեց, որ այս օրինագիծն ունի ինչպես դրական, այնպես էլ բացասական կողմեր։
«Ինչ վերաբերում է ասպիրանտուրային, ապա մարդիկ, որոնք համապատասխան աստիճան են ստացել` գիտության թեկնածու են, եվրոպական գիտությունն ավելի հասանելի կլինի», – ասաց նա` պատասխանելով Sputnik Արմենիայի հարցին։
Սակայն կան կետեր, որոնք մտածելու առիթ են տալիս, հավելեց Զաքարյանը։
«Օրինակ` հայկական բուհերում անվճար հիմունքներով մագիստրատուրա ընդունելության ժամանակ նախապատվություն է տրվում բուհի ուսանողներին, իսկ հետո արդեն այլ բուհերի ուսանողները կարող են պայքարել թափուր տեղերի համար», – ասաց նա։
Զաքարյանի խոսքով` այդ դեպքում խնդիր է առաջանում։ Օրինակ` եթե լավ գնահատականներով ուսանողն ուզում է փոխել բուհը կամ մասնագիտությունը, ապա նա գրեթե շանսեր չունի։
«Բարձրագույն կրթության մասին» ՀՀ նոր օրենքը կոչված է հայկական բուհերն ավելի ազատ, իսկ համալսարանային համակարգն` ավելի անկախ դարձնել, ինչի մասին ավելի վաղ հայտարարել էր Լևոն Մկրտչյանը։
Նոր օրինագիծը նախատեսում է, որ համալսարանների գիտխորհուրդները չպետք է քաղաքականացված լինեն։ Այսինք` քաղաքականությամբ զբաղվող անձիք չեն կարող ակադեմիական պաշտոններ զբաղեցնել։ Նոր օրենքի համաձայն` կկարգավորվեն բարձրագույն ուսումնական հաստատությունների ֆինանսավորման հետ կապված հարցերը։
«Բարձրագույն կրթության մասին» ՀՀ նոր օրինագիծը առաջիկայում ներկայացվելու է կառավարության քննարկմանը։
