ԵՐԵՎԱՆ, 13 դեկտեմբերի — Sputnik. Երևանում վաճառվող գարշահոտ բրինձն արհեստական ծագում չունի։ Նման եզրակացություն է հրապարակել Սննդի անվտանգության պետական ծառայությունը բրձի լաբորատոր փորձաքննությունից հետո։
«Լաբորատոր քննությունների արդյունքում պարզվել է, որ բրնձի պոլիմերային լինելու մասին լուրերը չեն համապատասխանում իրականությանը»,– ասված է ՍԱՊԾ հաղորդագրության մեջ։
Փոխարենը ՍԱՊԾ–ը չի հերքում, որ տվյալ խանութում վաճառվող բրինձն ունեցել է որակական շեղումներ։ Փաստաթղթերում նշված առաջին կարգի փոխարեն այն եղել է ավելի ցածր` մանրատված տեսակի, ունեցել է «արտահայտված հոտ», որը, ըստ ՍԱՊԾ–ի` «կարող էր պայմանավորված լիներ այլ ապրանքների հետ համատեղ պահեստավորմամբ»:
ՍԱՊԾ–ը վստահեցնում է, որ տհաճ հոտով բրինձը վաճառքից ամբողջությամբ հանվել է։
Ի դեպ, փորձաքննության ընթացքում նմուշառված բրինձը նաև այրվել է և, ինչպես հայտնում է պատկան կառույցը` «այրվել է պատշաճ որակի բրնձին համապատասխան ձևով, այրման ընթացքում բացակայել են պոլիմերային նյութերի այրմանը հատուկ երևույթները»։
Հիշեցնենք` գարշահոտ բրինձը ՍԱՊԾ էին ներկայացրել լրագրող Նարինե Կիրակոսյանը, ով վստահեցրել էր, որ այն նաև դժվարությամբ է եփվել, և ՀՀ ԳԱԱ Էկոկենտրոնի սննդի շղթայի ռիսկերի գնահատման կենտրոնի ղեկավար Դավիթ Պիպոյանը, ով հայտնել էր, որ բրինձը իրենց է տրամադրել կենտրոն այցելած քաղաքացին։
Մինչ այդ ՍԱՊԾ–ն պարզել էր, որ հիշյալ բրինձն իրացվել էր Դավիթաշեն թաղամասի Տիգրան Պետրոսյան 11/2 հասցեում գործող «Նուշ» խանութում։ Ներմուծողը «Արմեն-Համիկ» ՍՊԸ-ն է, որի պահեստում հայտնաբերվել էր ևս 130 կգ նույն տեսակի և խմբաքանակի բրինձ։
