ԵՐԵՎԱՆ, 12 դեկտեմբերի — Sputnik. Հենրիխ Մխիթարյանը և Ժոզե Մոուրինյոն արտակարգ հանդիպում են ունեցել։ Այդ մասին հաղորդում է TransferMarketWeb պարբերականը։
Ավելի վաղ տեղեկություն էր տարածվել, որ Հենրիխ Մխիթարյանը պատրաստվում է իր կարիերայի ապագան քննարկել «Մանչեսթեր Յունայթեդի» մարզիչ Ժոզե Մոուրինյոյի հետ։
«Որոշվել է տրանսֆերի հանել ֆուտբոլիստին։ Եթե Մխիթարյանը հետաքրքրված լինի իր վաճառքով (կամ թեկուզ վարձակալությամբ), ապա նրան կարող են գնել Բորուսիան և Ինտերը», — ասվում է հաղորդագրությունում։
Եվրոպական մի քանի ակումբներ նույնպես հայտնել են, որ հետաքրքրվում են հայ ֆուտբոլիստով։
Այս ընթացքում հայ կիսապաշտպան Հենրիխ Մխիթարյանի երկրպագուներն ակցիա են անցկացնում` աջակցելով իրենց սիրելի ֆուտբոլիստին։ Նրանք «Մանչեսթեր Յուանյթեդի» գլխավոր մարզիչ Ժոզե Մոուրինյոյի Instagram-ի էջն արդեն ողողել են կիսապաշտպանին դաշտ վերադարձնելու պահանջներով։
Մխիթարյանի պաշտպանների բանակը մշտապես աճում է։ Սոցցանցերում հայ երկրպագուների էջերը լի են Հենրիխ Մխիթարյանին սատարող հեշթեգերով։ Այժմ դրանց միացել է նոր, հայատառ #Հենոդուխով հեշթեգը։
Մխիթարյանը 2016թ-ի աշնանը Դորտմունդի «Բորուսիայից» տեղափոխվել է «Մանչեսթեր Յունայթեդ»` ակումբի հետ կնքելով քառամյա պայմանագիր` մեկ տարի երկարացնելու հնարավորությամբ։ Կիսապաշտպանի տրանսֆերի համար ակումբը վճարել է 42 միլիոն եվրո։
