Երեխային «Գարդասիլով» պատվաստելուց հրաժարվելու դեպքում ծնողը պետք է գրավոր ներկայացնի իր դիրքորոշումը և ստորագրի, որ զգուշացված է հնարավոր հետևանքների մասին։ Առողջապահության նախարարության այս պահանջը իրավապաշտպան Էմիլ Մարկոսյանն ապօրինի է համարում։
«Ցանկացած ծնող կարող է հրաժարվել որևէ փաստաթուղթ ստորագրելուց։ Հայաստանի Հանրապետությունում հայտարարությունն ու դիմումները լինում են ինչպես գրավոր, այնպես էլ բանավոր տեսքով։ Քաղաքացին կարող է բանավոր հրաժարվել իր երեխայի պատվաստումից»,- ասում է իրավապաշտպանը։
Հակառակ դեպքում Մարկոսյանը խորհուրդ է տալիս ծնողին համանման գրավոր փաստաթուղթ պահանջել բժշկից։
«Բժիշկն էլ թող ստորագրի, որ պատվաստման դեպքում, հնարավոր անդառնալի հետևանքի համար ինքը պատասխանատվություն է կրում»,- ասում է նա։
Այս տեսակետից, նրա խոսքով` ծնողն ու բժիշկը միմյանցից ստորագրված փաստաթուղթ պահանջելու հավասար իրավունքներ ունեն։
