ԵՐԵՎԱՆ, 12 դեկտեմբերի — Sputnik. Հայաստանի կառավարությունը չի օգնի ունևոր քաղաքացիների բնակարան գնելու հարցում: Այդ մասին Հայաստանի խորհրդարանում հայտարարեց ֆինանսների փոխնախարար Դավիթ Անանյանը՝ ներկայացնելով Հարկային օրենսգրքում փոփոխությունների նախագիծը:
Ըստ օրինագծի` եկամտահարկից վերադարձվող գումարը (նոր բնակարանի հիփոթեքի տոկոսի չափով) 2018թ-ից չի նախատեսվում 55 միլիոն դրամից թանկ անշարժ գույքի համար: Այդքան արժեն հարմարավետ բնակարանները Երևանի կենտրոնում կամ այլ շրջանների խոշոր առանձնատները:
2018 թվականի հունվարի 1-ից հետո եկամտային հարկի վերադարձման հնարավորությունից ֆիզիկական անձինք կարող են օգտվել միայն մեկ անգամ, այդ թվում՝ որպես համավարկառու։
Փոխնախարարի խոսքով, եթե քաղաքացին արդեն որոշել է նման թանկ բնակարան գնել, նշանակում է, որ նա աջակցության կարիք չունի:
Նման գնորդներից մեկը ստացել է ոչ ավել, ոչ պակաս 6,6 մլն դրամ հարկային վճարում:
«Այդ միջոցներն ավելի լավ է տնտեսել և ուղղորդել նրանց, ովքեր իսկապես դրանց կարիքն ունեն», — ասաց Անանյանը:
Նշենք, որ 2017թ-ի սկզբից Հայաստանի պետբյուջեից հիփոթեք ունեցողների աջակցությանը տրամադրվել է 220 մլն դրամ:
