ԵՐԵՎԱՆ, 12 դեկտեմբերի — Sputnik. Երկու ինտեգրացիոն նախագծերը` ԵԱՏՄ-ն ու ԵՄ-ն, որոնց հետ համագործակցում է Հայաստանը, ուժեղացնում են միմյանց, երեքշաբթի լրագրողներին ասաց ՀՀ-ում Ֆրանսիայի արտակարգ և լիազոր դեսպան Ժոնաթան Լաքոտը։
«Հայաստանի և ԵՄ-ի միջև համաձայնագիրը պատմական իրադարձություն է։ Այս համաձայնագիրը բացառիկ է, քանի որ միակ փաստաթուղթն է, որ ստորագրվել է ԵԱՏՄ անդամ-երկրի հետ։ Չեմ ասի` «աղն» է, բայց կարևոր է», — ասաց Լակոտը։
Նա նշեց, որ Հայաստանում բարեփոխումների իրականացումից հետո ֆրանսիական ընկերությունները կկարողանան գործել իրենց ավելի մոտ օրենսդրական դաշտում և հեռանկարում նաև Եվրասիական շուկա դուրս գալու հնարավորություն կունենան։
«Հայաստանը Եվրամիությունը Եվրասիական միությանը կապող կամրջի դեր է ստանձնում», — ասաց Լակոտը։
Բացի այդ, նրա խոսքով, ֆրանսիական ներդրողներն ուշադիր հետևում են իրանական շուկա դուրս գալու հեռանկարին։
Հայաստանը ԵՄ-ի հետ համապարփակ և ընդլայնված համագործակցության մասին համաձայնագիր ստորագրեց նոյեմբերի 24-ին Բրյուսելում անցկացված «Արևելյան գործընկերության» գագաթնաժողովում։
