ԵՐԵՎԱՆ, 11 դեկտեմբերի — Sputnik. Թուրքիայի նախագահ Ռեջեփ Թայիփ Էրդողանը դժգոհել է Հունաստանի տարածքում մզկիթների սակավաթիվ քանակից, գրում եմ ադրբեջանական ԶԼՄ-ները:
Հունաստանի վարչապետ Ալեքսիս Ցիպրասի հետ հանդիպման ժամանակ Ռեջեփ Թայիփ Էրդողանը դժգոհել է օսմանյան ժամանակաշրջանի պատմակամշակութային արժեքների վատ պահպանությունից, մզկիթների քչությունից, կղզու թուրքական վերաբնակեցման պլանը մերժող կիպրոսցիների ոչ կառուցողական դիրքորոշումից:
Բացի այդ, Էրդողանը բարձրացրել է Լոզանի պայմանագրի հարցը՝ նշելով, որ այնտեղ կան «մինչև հիմա անհասկանալի նրբություններ… չէ որ աշխարհը փոխվել է…»:
«Ես հասկանում եմ միջազգային իրավունքից և կարող եմ ասել, որ որոշ հանգամանքներում կնքված պայամանգրի կետերը կարող են վերանայվել: Համաշխարհային պրակտիկայում նման բազմաթիվ օրինակներ կան»,-ասել է Էրդողանը Աթենքում Հունաստանի նախագահի հետ հանդիպման ժամանակ, գրում է ՌԻԱ Նովոստին:
Իր հերթին Պրոկոպիս Պավլոպուլոսը նշել է, որ Լոզանի հաշտության պայմանագիրը քննարկման ենթակա չէ և վերանայման կարիք չունի:
Լոզանի պայմանագիրը 1923 թվականի հուլիսի 24-ին կնքված հաշտության պայմանագիր է՝ 8 ամիս տևած Լոզանի կոնֆերանսի հիմնական ավարտական փաստաթղթերից մեկը։ Այն պաշտոնապես հանգուցալուծեց Մերձավոր Արևելքում 1919-1922 թվականներին առկա հակամարտությունը, մասնավորապես՝ թուրք-հունական պատերազմը:
