ԵՐԵՎԱՆ, 11 դեկտեմբերի — Sputnik. 2018թ-ից ավտոմեքենա վաճառողները պետք է ստանան իրավատերերի թույլտվությունը, իսկ հասարակ վարորդների համար ամեն ինչ նույնը կմնա։
Եվրասիական միության մաքսային օրենսգիրքը չի խանգարի, որ Հայաստան ավտոմեքենա ներկրվի ցանկացած երկրից։ Այդ մասին լրագրողներին ասաց հանրապետության Պետեկամուտների կոմիտեի պետի տեղակալ Վախթանգ Միրումյանը։
Հասարակ քաղաքացիների համար ոչինչ չի փոխվի։ Կոշտ արգելք չի լինի նույնիսկ «կողմնակի» դիլերի համար. նրանց ուղղակի կպարտավորեցնեն թույլտվություն ստանալ իրավատերերից (ավտոկոնցեռնների) կամ բացառիկ մատակարարներից։ Առանց նրանց իմացության չի կարելի աշխատել։
Այժմ զուգահեռ ներկրումը Հայաստանում արգելված չէ։ Բայց 2018թ-ից հանրապետությունը կմիանա եվրասիական կանոններին և թույլ կտա, որ ապրանքները ներկրի միայն պաշտոնական ներկայացուցիչը։
«2015թ-ին, երբ մենք դարձանք ԵԱՏՄ անդամ, մենք տարկետում վերցրինք և երեք տարով պահպանեցինք զուգահեռ ներկրումը։ Այժմ մենք անցնում ենք եվրասիական ռեժիմի։ Բայց կրկնում եմ` խոսքը միայն իրավաբանական անձանց մասին է։ Անձնական օգտագործման մեքենաները առաջվա պես կարելի է ներկրել նախկին կարգով», — ասաց Միրումյանը։
Նշենք, որ 2017թ-ի ապրիլին Եվրասիական տնտեսական հանձնաժողովը թույլատրել է ապրանքների զուգահեռ ներկրումը, բայց միայն առանձին դեպքերում. եթե տվյալ ապրանքը բավարար քանակությամբ չկա ԵԱՏՄ շուկայում կամ այն չարդարացված թանկ է վաճառվում։ ԵԱՏՄ երկրները համատեղ կորոշեն, թե որ ապրանքները որքան երկար կթույլատրվի ներկրել։
