ԵՐԵՎԱՆ, 11 դեկտեմբերի — Sputnik. Հաշվի առնելով բարձրակարգ մասնագետների առկայությունը Հայաստանում`«NOKIA» ընկերությունն առաջիկայում այստեղ R&D (գիտահետազոտական) լաբորատորիա կբացի։
Այս մասին պայմանավորվածությունը ձեռք է բերվել այսօր, ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանի և «NOKIA» ընկերության Եվրոպայի, Միջին Արևելքի և Աֆրիկայի հետ հարաբերությունների կառավարման ղեկավար Օլաֆ Շուլցի հանդիպման ընթացքում։
Նախարար Մարտիրոսյանը ցանկություն է հայտնել նաև, որ ընկերությունը մասնակցի Հայաստանում 5G ծածկույթ ներդնելու ծրագրին:
Նա հույս է հայտնել, որ «NOKIA»-ի ներկայացվածությունը Հայաստանում կլինի ոչ միայն հեռահաղորդակցության, այլև թվային ենթակառուցվածքների ոլորտում։
Հանդիպման ընթացքում քննարկվել է նաև տրանսպորտային թվային համակարգ ներդնելու «NOKIA»-ի փորձը Հայաստանում կիրառելու հնարավորությունը։
