ԵՐԵՎԱՆ, 11 դեկտեմբերի — Sputnik. Քանի դեռ գիտությունը չի ապացուցել ԳՁՕ (գենետիկորեն ձևափոխված օրգանիզմներ) անվտանգությունը, ՀՀ գյուղատնտեսության նախարարությունը որոշել է արգելել դրանց կիրառումը:
Նման որոշում է ընդունվել այդ հարցով ստեղծված աշխատանքային խմբի առաջին նիստում, որը վարել է ՀՀ գյուղատնտեսության նախարար Իգնատի Առաքելյանը:
ԳՁՕ-ների գործածության օրենսդրական կարգավորումները ևս առաջիկայում կիրականացվեն նույն «նախազգուշավորության սկզբունքով»։
ՀՀ գյուղատնտեսության նախարար Իգնատի Առաքելյանը հանձնարարել է ուսումնասիրել «ՀՀ-ում ԳՁՕ-ների գործածության կենսաանվտանգության մասին» ՀՀ օրենքի նախագիծը և կատարել անհրաժեշտ լրամշակումներ։
Քննարկման մասնակիցները կարևորել են նաև սպառողների իրազեկվածության մակարդակի բարձրացումը և այդ թեմայի շուրջ պարբերաբար զանգվածային լրատվության միջոցներով հաղորդումների կազմակերպումը։