Հոկտեմբերին մեկնարկած ու շարունակվող գնաճը դեկտեմբերին կհասնի ԿԲ–ի կանխատեսած 4%–ին։ Sputnik Արմենիայի հետ զրույցում նման կանխատեսում է արել տնտեսագետ Ատոմ Մարգարյանը։
«Գնաճը սկսվել է հոկտեմբերից և աստիճանաբար թափ է հավաքում։ Այն 480 ապրանքը, որ դրվում է սպառողական զամբյուղում և որոնցով ԱՎԾ–ն հաշվարկում է գնաճը, հոկտեմբերին 0.8% էր, իսկ նոյեմբերին արդեն հոկտեմբերի համեմատ 2%-ով աճ ունենք»,–ասում է Մարգարյանը` հավելելով, որ ընդհանուր առմամբ 11 ամսվա ընթացքում գնաճը կազմել է 1.2%։
Ամենաշատը թանկացել է սննդամթերքը, հատկապես` միրգ–բանջարեղենը` ավելի քան 20%։
«Բայց դրան զուգահեռ պետք է նաև մարդկանց եկամուտներն աճեն, մինչդեռ, աշխատավարձերի, նպաստների թոշակների չափը չի բարձրացել։ Շուրջ 30%–ն ապրում է աղքատության գծից ցածր»,– ասում է տնտեսագետը` միաժամանակ քննադատելով աղքատության թեմայով արված քաղաքական ծայրահեղ ու անպարկեշտ գնահատականները։
