Տերունական աղոթքի փոփոխությունն անթույլատրելի է։ Sputnik Արմենիայի հետ զրույցում, մեկնաբանելով աղոթքի տեքստում փոփոխություններ կատարելու մասին արևմտյան մամուլում տարածված լուրերը, նման կարծիք է հայտնել կրոնագետ, աստվածաբան Վարդան Խաչատրյանը։
Նրա խոսքով, ըստ Աստվածաշնչի, Տերունական աղոթքն առաքյալները ստացել են Հիսուս Քրիստոսից` որպես ավանդ, ուստի դրա ճշգրտությունը վիճարկելը կարող է հանգեցնել քրիստոնեության և այլ կրոնների հարաբերություններում նոր ճնշումների։
«Սա կարևորագույն աղոթքն է, որը մարդուն բարձր է դասում մարդ–բնություն, մարդ–տիեզերք հարաբերությունների մեջ։ Մարդ ուղղահայաց կարող է կանգնել ու դիմել Աստծուն, և ոչ թե այլ կրոնների պես ընկնել գետնին ու ասել` ես ցեխի կտոր եմ, փոշեհատիկ եմ»,– ասում է Խաչատրյանը։
Աղոթքի նկատմամբ ցանկացած թերահավատություն, Վարդան Խաչատրյանի համոզմամբ, կարող տարաբնույթ մեկնաբանությունների և քրիստոնեության դեմ նոր քարոզարշավի առիթ դառնալ։ Առավել ևս, որ Եվրոպայում տիրող մթնոլորտը նման փոփոխություններ ձեռնարկելու համար բարենպաստ չէ։
