Արմենուհի Մխոյան, Sputnik.
Այսուհետև Գյումրին աշխարհին կներկայանա սև, կարմիր ու նարնջագույն, Գյումրի բառի լատինատառ G տառի տեսքով: Հայրաքաղաքի բրենդավորման գործն իր ուսերին առած Deem Communications PR և մարկեթինգային ընկերությունը վստահեցնում է՝ Գյումրու բրենդը կօգնի քաղաքի կերպարն ու զարգացման հեռանկարները յուրովի ներկայացնել աշխարհին:
«Մենք ընտրել ենք լատինատառ Գյումրին (GYUMRI), այն սիմվոլով ենք ներկայացնում, որպեսզի կարողանանք քաղաքի պատմությունը ներկայանալի դարձնել նայողին և լսողին»,- նշում է Գյումրու բրենդավորման ծրագրի ղեկավար Րաֆֆի Նիզիլբյանը։
Սիմվոլներից առաջինը՝ G-ն, Սև Բերդն է` որպես ճարտարապետության սիմվոլ, երկրորդը՝ Y-ն՝ չեմպիոնների քաղաք, U-ն խորհրդանշում է գարեջուր, M տառը ներկայացնում է տեխնոլոգիական կենտրոնի շենքը, R տառն` արվեստ և արհեստ, իսկ I-ն երեք հատկանիշ ունի՝ մեկը հումորն է, 2–րդը բարբառը, մյուսը մարդիկ են։
Գյումրու բրենդի մշակման և առաջխաղացման ծրագիրը նախաձեռնող ու իրականացնող ընկերությունն աշխատանքն անում է Գյումրու քաղաքապետարանի և ՀՀ զբոսաշրջության պետական կոմիտեի համագործակցությամբ: Բրենդի մշակման համար հիմք են հանդիսացել քաղաքի պաշտմամշակութային ժառանգության, տնտեսության, բիզնես միջավայրի և այլ ոլորտների վերաբերյալ ուսումնասիրությունները: Ծրագրի շրջանակում ստեղծվել էր աշխատանքային խումբ' կազմված տարբեր ոլորտների ներկայացուցիչներից, որոնք խորհրդատվության և փորձագիտական կարծիք են տրամադրել:
Եթե նախաձեռնության հեղինակները կատարված աշխատանքից շատ գոհ են, ապա հասարակ գյումրեցու համար քաղաքի բրենդավորման կարիքը չկար՝ հատկապես, ըստ նրանց, ասվածը ո՛չ նորություն է, ո՛չ է դրանով պետք է Գյումրին զարգանա։ Գյումրեցին ինքն էլ գիտի՝ մշակույթի, ճարտարապետության ու սպորտի քաղաք է, իսկ քաղաքը զարգացնել ու զբոսաշրջիկին քաղաք բերել պետք է ոչ թե լատինատառ G տառով, այլ քաղաք տանող ու քաղաքի բարեկարգ ճանապարհներով, բարձրակարգ սպասարկում ունեցող ու վերանորոգված օդանավակայանով ու երկաթուղով և, վերջապես, մաքուր քաղաքի շնորհիվ: Գյումրու համար բրենդը հենց գյումրեցին է:
