ԵՐԵՎԱՆ, 9 դեկտեմբերի — Sputnik. Ադրբեջանցի օգտատերերը դժգոհությամբ են ընդունել այն լուրը, որ ադրբեջանցի հայտնի ոճաբան Շաֆահ Նովրուզովային հրավիրել են Նյու Յորք` վարպետության դասընթացի մասնակցելու համար, քանի որ հրավերն ուղարկել է նրա հայ գործընկեր Էլիս Աթախանյանը։ Վերջինն ապրում է ԱՄՆ-ում և նույնպես ոճաբան է:
Նովրուզովան հրավերի մասին հայտնել է Instagram-ի իր էջում, բայց չի նշել հրավիրողի ազգանունը: Օգտատերերը հաշված րոպեների ընթացքում պարզել են վարպետության դասընթացի կազմակերպչի ազգանունն ու ազգությունը և սկսել են դատապարտել նրան:
Նովրուզովան Ադրբեջանի ժողովրդական արտիստ, դերասան Ռամիզ Նովրուզովի դուստրն է: Նրան նախկինում ևս քննադատել էին հայերի հետ ընկերություն անելու համար։ Խոսքը վերաբերում էր Սոչիում բնակվող ոճաբան Գեորգի Կոտեին, որը հայ է մորական կողմից:
