ԵՐԵՎԱՆ, 9 դեկտեմբերի — Sputnik. Ռուսաստանաբնակ Մարատ Ուելդանովը, (Գալուստյան) Խազարի շրջանային դատարանի որոշման համաձայն, բանտ է տեղափոխվել պատիժը կրելու համար, հայտնում է ՌԻԱ Նովոստին` հղում անելով ադրբեջանական ԶԼՄ-ներին:
Ուելդանովը դժգոհ է դատարանի որոշումից և դիմել է Վերաքննիչ դատարան:
«Նա խնդրել է չեղյալ համարել առաջին ատյանի դատարանի որոշումը: Ուելդանովի բողոքն ուղարկվել է Բաքվի Վերաքննիչ դատարան: Գործը հանձնել են դատավոր Գաիլ Մամեդովին, առաջին նիստը նշանակվել է դեկտեմբերի 12-ին», — նշված է գործակալության հաղորդագրության մեջ:
Մարատ Ուելդանով-Գալուստյանը ձերբակալվել էր 2016թ. հունիսի 9-ին Բաքվում: Ադրբեջանում ՌԴ դեսպանատունը հայտնել էր, որ Մարատը մեղադրվում է թմրանյութերի անօրինական պահպանման և տարածման մեջ:
Մարատը երկար տարիներ աշխատել է Բաքվում, պարբերաբար այցելել Մոսկվա: Նա ձերբակալվել է 2016 թ-ի հունիսի 9-ին։ Ձերբակալությունից մի քանի օր անց դեսպանատուն է դիմել քաղաքացի Մարիաննա Միրզոյանը՝ հայտնելով, որ ձերբակալվածն իր եղբայրն է, իսկական ազգանունը Գալուստյան է, և նա ձերբակալվել է ոչ թե թմրանյութերի ապօրինի շրջանառության, այլ լրտեսության կասկածանքով։
Մարատ Ուելդանովը Ադրբեջանում մեկ տարուց ավելի աշխատել է ավստրիական «Do&Co» ընկերությունում, որը զբաղվում է հյուրանոցային բիզնեսով: Քանի որ նրա անձնագրում նշված է ոչ թե իր հայկական ազգանունը, այլ՝ կնոջ, Բաքվում երբեք չի հայտնվել ուշադրության կենտրոնում: Մարատը 1990-ականներից Ռուսաստան էր տեղափոխվել Բաքվից՝ իր ընտանիքի հետ:
Մարատի ձերբակալության մասին քույրն իմացել է նրա գործընկերոջից՝ Ելենա Մակարենկոյից, որին նույնպես ձերբակալել էին 15 օրով և պահել մեկուսարանում միայն այն բանի համար, որ նա Մարատի հետ գործնական հարաբերություններ է ունեցել։ 2016թ-ի օգոստոսի 17-ին Ռուսաստանի ԱԳՆ ներկայացուցիչ Մարիա Զախարովան մեկնաբանել է իրավիճակը` հայտարարելով, որ Ռուսաստանի ԱԳՆ-ն ազգային ենթատեքստ չի տեսնում Մարատ Ուելդանով-Գալուստյանի ձերբակալության մեջ։
Ուելդանովի գործով դատական որոշումը կայացվել է ապրիլի 28-ին. փակ նիստի ժամանակ դատարանը Մարատ Ուելդանովին 8 տարվա ազատազրկման է դատապարտել:
