ԵՐԵՎԱՆ, 9 դեկտեմբերի — Sputnik. Համացանցում բևեռային արջի մասին մի հուզիչ տեսանյութ է տարածվել։ Նկարահանումն իրականացրել է National Geographic-ի «Ծովերի ժառանգությունը» բնապահպանական նախագծի նկարահանող խումբը: Նախագծի հիմնադիր, լուսանկարիչ Փոլ Նիկլենը դեկտեմբերի 6-ին տեսանյութը հրապարակել է Instagram-ի իր էջում:
Տեսանյութը դիտվել է ավելի քան 1,1 մլն անգամ, մեկնաբանությունների թիվը հասնում է 16 հազարի: Օգտատերերը գրում են, որ ցնցվել են տեսանյութից, տխրել են ու ցավ ապրել:
Նիկլենը մեկնաբանություն է թողել տեսանյութի տակ` հայտնելով, որ կոնկրետ այս արջին արդեն անհնար էր օգնել:
«Բևեռային արջի մահը նկարահանելու ընթացքում մեր թիմը հազիվ էր զսպում արցունքներն ու հույզերը: Այդ հոգեցունց տեսարանը մինչև այսօր էլ հետապնդում է ինձ, բայց ես գիտեմ` մենք պետք է տարածենք այս տեսանյութը, որպեսզի ջարդենք անտարբերության պատը», — գրել է լուսանկարիչը:
Սովի հետևանքով արջի մոտ ի հայտ էր եկել վառ արտահայտված մկանային ատրոֆիա, և նա հազիվ էր տեղաշարժվում: Նիկլենը նշել է, որ գիտնականների կանխատեսումների համաձայն` բևեռային արջերը, որոնցից շուրջ 25 000 է մնացել, բոլորն անխտիր կվերանան 100 տարվա ընթացքում:
«Ճշմարտությունն այս է. եթե Երկիրը շարունակի տաքանալ, մենք կկորցնենք ինչպես արջերին, այնպես էլ ամբողջական բևեռային էկոհամակարգերը: Այս արջը ծեր չէր, բայց նկարահանման պահից հաշված ժամերի կամ օրերի ընթացքում նա սատկեց», — նշել է Նիկլենը` ընդգծելով, որ խնդիրները հեշտ լուծում ստանալ չեն կարող, կարող են միայն գլոբալ լուծումներ ունենալ։
«Մենք պետք է նվազեցնենք ածխաթթու գազի արտանետումները, ճիշտ սնվենք, դադարենք անտառները վերացնել և վերջապես սկսենք առաջին տեղը դասել Երկիրը` մեր տունը»:
