ԵՐԵՎԱՆ, 8 դեկտեմբերի — Sputnik. Հարկային ծառայությունը կկարողանա ստուգել մանրածախ առևտրի օրինականությունը թաքնված տեսախցիկներով։ Պետեկամուտների կոմիտեն նման լիազորություններ է առաջարկել Հարկային օրենսգրքի փոփոխությունների նախագծում։
Նախագիծը դեռևս գտնվում է քննարկումների փուլում։
Իշխանությունն ընդհատակյա առևտրին պատերազմ էր հայտարարել դեռ 2004թ–ից, երբ առևտրականներին պարտավորեցրել էր մինչև 2010թ–ը հսկիչ–դրամարկղային մեքենաներ տեղադրել։ Իսկ մինչև 2018թ–ը բոլորը պետք է ունենային նոր նմուշի մեքենաներ։ Դրանք ոչ միայն կտրոններ են տպում, այլ նաև տվյալները փոխանցում են հարկային ծառայությանը։
Եթե վաճառողը կտրոն չի տպում, ուրեմն այն կորած է։ Կարելի է խանութներում ստուգիչ գնումներ իրականացնել, բայց տեխնիկայով ավելի ճիշտ է, կարծում են իշխանությունները։
Ուստի հարկային տեսուչներին առաջարկել են նստել տեսախցիկների մոտ։ Տեսխցիկները կշրջեն հսկիչ–դրամարկղային սարքեր և վաճառասեղանների կողմ, որպեսզի երևա` վաճառողը կտրոն տպում է, թե ոչ։ Վաճառողները կարող են չիմանալ, թե որտեղ են տեղադրվելու տեսախցիկները, որպեսզի չկորցնեն զգոնությունը կամ տեղափոխեն վաճառասեղանները։
ՊԵԿ կարծիքով` այդ դեպքում առևտուրը զգալիորեն թափանցիկ կդառնա։
«Հարկատուների և բիզնեսի պաշտպանություն» ՀԿ–ի նախագահ Արմեն Եսոյանի կարծիքով` պետք է տարբերակել երկու պահերը` էթիկական և ֆիսքալային։
«Հնարավոր է` վաճառողը չի ցանկանում, որ ինչ–որ մեկն ամբողջ օրը նայի իրեն։ Ինչ է հագել, ինչպես է ձգվում կամ ժպտում։ Այնպես որ պետք է նկարել միայն ստուգիչ գնումների դեպքում, այլ ոչ թե շուրջօրյա։ Դա էթիկայի հարց է։ Իսկ եթե խոսենք օրենքի մասին, ապա կտրոններ բոլորը պետք է տպեն։ Ես նման կոչ եմ անում բիզնեսին։ Եթե ձեզ մոտ ամեն ինչ օրենքով է, հարկայինը ձեզ չի դիպչի, ուստի պետք չէ անընդհատ նկարել, իսկ ստուգիչ գնումների ժամանակ կարելի է», – հայտարարել է նա։
Նշենք, որ «Հսկիչ-դրամարկղային մեքենաների կիրառման մասին» Հայաստանի Հանրապետության օրենքի համաձայն` ապրանք վաճառելիս կտրոնի բացակայության համար խանութները և առևտրի այլ կետերը տուգանվում են 300 հազար, իսկ խոշոր ռեստորանները` մեկ միլիոն դրամով։ Կրկնակի խախտման դեպքում տուգանքը կրկնապատկվում է։
