ԵՐԵՎԱՆ, 7 դեկտեմբերի — Sputnik. Մրցույթի մասնակիցներ Սեդա Սարգսյանը, Մարթա Բաղդասարյանն ու Սրբուհի Ավանեսյանը մարտական են տրամադրված. նրանք Հայաստանն են ներկայացնելու «Թոփ մոդել ԱՊՀ-2017» միջազգային մրցույթում։
Միջազգային մրցույթն անցկացվելու է Երևանում դեկտեմբերի 10-ին։ ԱՊՀ և Մերձբալթյան երկրներից, ինչպես նաև Ռումինիայից և Բուլղարիայից Հայաստանի մայրաքաղաք են ժամանել 30 մասնակից։ Միջոցառումն անցկացվելու է Կարեն Դեմիրճյանի անվան մարզահամերգային համալիրում։
Sputnik Արմենիան հյուրընկալել էր մրցույթի հայ մասնակիցներին։
Սեդա Սարգսյան
Սեդան 15 տարեկան է և հեղինակավոր մրցույթի ամենաերիտասարդ մասնակիցը, սովորում է Երևանի բժշկական քոլեջում։
«Ընտրել եմ բուժքրոջ մասնագիտությունը, կարծում եմ, որ ամենաօգտակար մասնագիտություններից մեկն է։ Փորձում եմ համատեղել ուսումս մոդելի մասնագիտության հետ։ Իհարկե, ցանկանում եմ ըստ արժանվույն ներկայանալ մրցույթին և հաղթել», — նշեց Սեդան։
Նա ավելացրեց, որ հուզվում է, քանի որ առաջին անգամ է պրոֆեսիոնալ բեմ դուրս գալու։
Սեդայի խոսքով, այս մրցույթը նոր մարդկանց հետ ծանոթանալու հիանալի հնարավորություն է ընձեռում և նոր դռներ է բացում մոդելների առաջ։
«Ես կկարողանամ այլ կողմից նայել ինձ, փորձ ձեռք բերել։ Նույնիսկ եթե հաղթել չհաջողվի, միևնույնն է` աշխարհի այլ երկրների նորաձևության ինդուստրիայի ներկայացուցիչներից համագործակցության հրավեր ստանալու հիանալի հնարավորություն կլինի», — ասաց նա։
Մարթա Բաղդասարյան
Հայաստանը ներկայացնող երկրորդ մասնակիցը 17 տարեկան Մարթա Բաղդասարյանն է` Հայաստանի ազգային պոլիտեխնիկական համալսարանի քոլեջի երրորդ կուրսի ուսանողուհին։
Sputnik Արմենիայի թղթակցի հետ զրույցում նա նշեց, որ Հայաստանի մասնակիցների ընտրությունը խիստ կանոններով է անցկացվել։
«Հայաստանը ներկայացնելը մեզ համար մեծ պատիվ է։ 17 տարեկան… Թեև մենք ուսուցում ենք անցել մոդելների դպրոցում, այնուամենայնիվ այս օրերին մեզ կրկին զրոյից են նախապատրաստում. սովորեցնում են ինչպես քայլել բեմում, տարբեր կեցվածքներ ընդունել, ինչպես պահել տեսախցիկի և լսարանի առջև։ Մասնագետները, որոնք մեզ հետ պարապում են, անում են հնարավոր ամեն բան, որպեսզի դեկտեմբերի 10-ին ամեն ինչ հրաշալի անցնի։ Հիանալի շոու է լինելու, որը պետք է տեսնել», — ասաց Մարթան։
Նա պատմեց, որ մրցույթի ընթացքում աղջիկները հանդիսատեսի և ժյուրիի առաջ կներկայանան երեք անգամ` լողազգեստով և մուշտակներով, Կոկո Շանելի կերպարում, ինչպես նաև հայ դիզայներների կարած հագուստով։
«Մենք շփվում ենք բոլոր աղջիկների հետ, իսկ մեզ համար որոշել ենք, որ կյանքում չենք մրցելու միմյանց հետ, միայն բեմում», — ավելացրեց Մարթան։
Այս մրցույթին մասնակցելը, նրա խոսքով, ցանկացած մոդելի համար լավ գովազդ է, ինչպես նաև հմուտ մասնագետների և վարպետների հետ ծանոթանալու հնարավորություն։
Սրբուհի Ավանեսյան
Հայաստանի երրորդ ներկայացուցիչը 20 տարեկան Սրբուհի Ավանեսյանն է։ Մասնագիտությամբ ռեժիսոր է, բայց նրան ավելի հոգեհարազատ է կերպարանափոխությունը. Սրբուհին պրոֆեսիոնալ մոդել է, դերասանուհի, նկարահանվում է ֆիլմերում և սերիալներում։
«Երազում եմ համագործակցել Dior, Chanel ապրանքանիշների հետ… Ինձ ոգեշնչում է այն, որ աշխատելու ենք պրոֆեսիոնալների հետ։ Խոսքը միայն մարդկանց մասին չէ, ովքեր նախապատրաստում են մեզ մրցույթի համար, այլև այն աղջիկների, որոնք Երևան են ժամանելու», — ասաց մոդելը։
«Հայաստանը ներկայացնող բոլոր մասնակիցներից միայն ես եմ մասնակցել գեղեցկության մեծ մրցույթի. «Միսս Հայաստանն» էր, բայց ոչ մի տեղ չզբաղեցրի», — տխրությամբ նշեց Սրբուհին։
Աղջիկը, սակայն, չի ընկճվում է և պատրաստ է բեմ բարձրանալ տարբեր երկրներից ժամանած գեղեցկուհիների հետ։
«Մենք արդեն հասցրել ենք ծանոթանալ մյուս երկրների ներկայացուցիչների հետ, ասեմ, որ հիմնականում պրոֆեսիոնալ մոդելներ են։ Մեծ պատիվ է նրանց հետ նույն բեմ դուրս գալը», — նշեց Սրբուհին։
Նշենք, որ «Թոփ մոդել ԱՊՀ-2017» մրցույթին ներկա լինելու համար ԱՊՀ երկրներից Հայաստան կժամանեն նորաձևության և շոու-բիզնեսի ոլորտի փորձագետները։
